Tiô tơdroăng a hneăng hôp, Dak Lak ƀă Bình Định hiăng ai mâu tơdroăng tơrŭm mơnhông mơdêk ôm hyô sap hơnăm 2016 ing tơdroăng kĭ tơkêa mơjiâng tơdroăng tơrŭm mơnhông mơdêk ôm hyô 4 kong pơlê Bình Định – Phú Yên – Gia Lai – Dak Lak.

Troh hơnăm 2022, tơdroăng tơrŭm kố châ tơ’nôm 2 kong pơlê Quảng Ngãi ƀă Kon Tum, mơjiâng tơdroăng tơdjêp mơnhông mơdêk 6 kong pơlê peăng tơdế Tơnêi têa – Tây Nguyên ƀă dó inâi Tây Nguyên loăng pơlái kong kế kân rơdâ.

A hneăng hôp, kăn pơkuâ kơvâ ôm hyô 2 kong pơlê hiăng tơbleăng ‘na tơmeăm ôm hyô, tơdroăng ki kal, leh hô̆i mơhno khôi túa lĕm tro tơ’noăng ivá ƀă ôm hyô tung hơnăm kố dêi péa kong pơlê. Mâu kăn teăng mâ xuân tơpui tơno ‘na mâu troăng thăm tơrŭm mơnhông mơdêk tour tơdjêp, ki má lối cho tung rơnó ôm hyô rơnó pơtê hriâm hơnăm 2023; thăm pơtâng tối, mơhnhôk tơmối ôm hyô troh Bình Định ƀă tơrôu.

Kăn teăng mâ khu tê mơdró 2 kong pơlê xuân tơdrăng tơpui tơno, tối mâu tơdroăng pá puât, tơvâ tơvân kal tah lôi xuân môi tiah pơkâ mâu troăng vâ thăm tơrŭm cheăng, mơhnhôk tơdroăng kal vâ prôk ôm hyô.