Tung lối môi khế, 6 to lâm hnê tŏn chêng koăng, kơxuăng ƀă hnê ‘na túa ki vâ pro ôm hyô pơlê pơla châ tơkŭm po a mâu thôn pơlê dêi mơngế Rơđế a bêng Buôn Ma Thuột, kong pơlê Dak Lak tơ’mot châ lối 130 ngế hriâm.

Tung mê, mâu lâm hnê tŏn chêng koăng ai 60 ngế hriâm, hơnăm iâ má môi cho 8 hơnăm, ngế hơnăm hên má môi cho 35 hơnăm. Pakĭng mâu ƀai chêng ki tơ’lêi hlâu, mâu ngế hriâm ối châ mâu ngê̆ nhân hnê mâu ƀai chêng ki xơpá tâ vâ mơđah tŏn tung mâu rôh po mơdĭng ƀă tơdroăng ki pro ôm hyô. Mâu lâm hnê kơxuăng xuân tơrŭm tơdroăng ki kal ƀă ki xơpá, gum ăm mâu ngế hriâm hriâm pât túa ki mơđah tơbleăng ƀă hlê nhên tâ ‘na ki kơnía dêi ngê̆ thuât kơxuăng chal krâ.

Cho môi tung mâu ngế hriâm tung lâm kơxuăng, o H’Na Si Mlô, a ƀuôn Đung, bêng Buôn Ma Thuột, ăm ‘nâi, ôh tá xê to hriâm mâu túa kơ’nhon xuăng, mê á ối hlê tơ’nôm ki pơxúa dêi rêm túa kơ’nhon xuăng, ing mê chiâng rế hâk vâ ƀă rơhêng vâ rak vế túa lĕm tro dêi hdrông kuăn ngo tơná.

“Á rơhêng vâ ai hên rôh ki châ hriâm môi tiah kố ăm mâu vâi o tung rơxông kơ’nâi, xuân châ ‘nâi troh túa kơ’nhon xuăng, vâ túa kơ’nhon xoăng kố ôh tá tro piu lôi”.

Bô bối ƀă tơdroăng mê, pái to lâm hnê pro ôm hyô pơlê pơla xua giảng viên Hngêi trung Kao đăng Du lịch Sài Gòn hnê hiăng hnê ăm mâu ngế hriâm a ƀuôn Akŏ Dhông ‘na túa ki gum tơmối, pế pơchên kế kâ ƀă mơjiâng pro túa ki pro ôm hyô pơlê pơla.

Jâ Phạm Thị Hải Bình, Phŏ pơkuâ Tíu pêi cheăng Cung ứng dịch vụ sự nghiệp công bêng Buôn Ma Thuột ăm ‘nâi, tơdroăng ki tơrŭm hnê tŏn chêng koăng ƀă hnê túa ki vâ pro ôm hyô pơlê pơla cho troăng prôk ki nếo vâ hnê mâu ngế ki pơtó tung rak vế túa lĕm tro chal krâ, rế tí tăng châ tơƀrê ki kơnía tung mơjiâng pro ôm hyô.

“Hơnăm kố, pakĭng mâu lâm hnê tŏn chêng koăng, kơxuăng, bêng hiăng tơrŭm ƀă Hngêi trung Kao đăng Du lịch Sài Gòn po pái to lâm hnê tú ki tơdah tơmối, mơdêk tơdroăng ki pế pơchên kế kân ăm mâu rơpŏng kuăn pơlê ki ai tơmiât vâ pế pơchên kế kâ ƀă mơjiâng pro túa ôm hyô pơlê pơla. Ing mâu lâm hriâm, mâu ngế hriâm châ hriâm mâu tơdroăng ki ai pơxúa vâ rế hía rế mơjiâng mâu túa pro ôm hyô pơlê pơla a kong pơlê”.

Mơgêi mâu hneăng hriâm, hên ngế hriâm hiăng chiâng tŏn chêng koăng, kơxuăng ƀă ‘nâi mâu túa ki pêi pro tơ’lêi hlâu tung tơdroăng rak vế túa lĕm tro. Túa pêi kố châ tơngah veăng rak vế chêng koăng Tây Nguyên tro ƀă mơjiâng pro ôm hyô pơlê pơla, pro chiâng tơdroăng cheăng pêi kâ tung pơlê pơla.