Klêi 7 khế pêi pro, kong pơlê Dak Lak hiăng pêi kêi đeăng 4 tung kơxô̆ 10 pơkâ xiâm ƀă 14/32 hnoăng cheăng dêi hơnăm 2026; mâu pơkâ, hnoăng cheăng ki u ối dế châ pêi pro tro tiô pơkâ. Kong pơlê hiăng tơbleăng hên troăng pơkâ pêi, troăng hơlâ ki kal, ki má môi cho cho Tơdroăng xiâm tơbleăng a rôh hôp 03 ‘na tŏng gum gâk kring ƀă mơnhông ki kơnâ tơmeăm khôi túa lĕm tro chêng koăng hneăng hơnăm 2026 – 2030; pêi pro mơjiâng ‘noăng chư chêh tơmeăm kơnía rôh nah, pro hô sơ khoa hok ƀă mâu tơmeăm kơnía, tíu chôu ‘măn tơmeăm khoăng rôh nah; tơdrêng amê hbrâ mâu tơdroăng ki kal khôi túa lĕm tro, ôm hyô kân môi tiah Leh tơbleăng plâi Sầu riêng Dak Lak hơnăm 2026 ƀă Leh tơbleăng Kơphế Ƀuôn Ma Thuột rôh má 10 hơnăm 2027.

Tơpui tơno a rôh hôp, mâu kăn teăng mâ pơkâ kơjo mơ’no liăn cheăng rơnêu bro tíu tơmeăm rôh ton nah, mơjiâng tơmeăm khôi túa lĕm tro - ôm hyô ki phá tơ-ê, mơdêk xúa kŏng ngê̆ tơmeăm khoăng rôh ton nah, rak vế rơkong tơpui, chư chêh dêi kuăn pơlê hdrông kuăn ngo M’Nông, Jarai ƀă mơdêk kơxô̆ liăn ăm kơvâ khôi túa lĕm tro vâ pêi pro châ tơƀrê mâu ki kơnâ khôi túa lĕm tro gum mơnhông ôm hyô.

Mơgêi rôh hôp, jâ Huỳnh Thị Chiến Hòa, Phŏ Kăn pơkuâ hnê ngăn Tỉnh uỷ, Phŏ Kăn pơkuâ hnê mơhno má môi Khu hnê mơhno ‘na mơnhông khôi túa lĕm tro kong pơlê Dak Lak tối rơdêi, tơdroăng châ tơƀrê apoăng nếo mơjiâng xiâm rêi, ki kal cho thế pro mâu troăng hơlâ chiâng mâu tơmeăm khôi túa lĕm tro ki kơnâ, mơjiâng mâu kơvâ kơmăi kơmok ƀă ôm hyô khôi túa lĕm tŭm ivá gum tung tơtêk dêi kong pơlê.

Jâ Huỳnh Thị Chiến Hòa pơkâ mâu khu, kơvâ cheăng, kong pơlê tơkŭm kêi đeăng mâu pơkâ ki u ối, ki rơhêng vâ tối cho hnoăng cheăng xúa kŏng ngê̆ măng internet chêh ‘măn tơmeăm khoăng kơnía rôh nah, mơjiâng inâi tơmeăm khôi túa lĕm tro ƀă khôi túa lĕm tro xúa kŏng ngê̆ măng internet ƀă ki pơxúa krê dêi kong pơlê Dak Lak.

“Tơkŭm pêi pro kêi đeăng mâu pơkâ ki u ối ƀă pơkâ tơdjâk troh xúa kŏng ngê̆ internet mâu tơmeăm kơnía rôh nah tơnêi têa ƀă tơmeăm rôh nah tơnêi têa ki krip má môi. 10 hnoăng cheăng ki u ối dêi hơnăm 2026 đi đo séa ngăn mơhnhôk teăm tơdrêng tah lôi pá puât, tơvâ tơvân, ki má lối cho mâu tơvâ tơvân ki nếo ing xiâm rêi. Mơjiâng inâi mâu tơmeăm kơmăi kơmok,  tơdroăng cheăng kâ - rêh ối khôi túa lĕm tro tối tơdjuôm ƀă khôi túa lĕm tro xúa kŏng ngê̆ tối krê ki lĕm tui tơdroăng, pro vâi hâk vâ, tơtro ƀă méa krê, tơdroăng ƀă mơngế pêi cheăng dêi kong pơlê”.