Môi kơxo má a rơlố Nhơn Châu (Cù Lao Xanh), mâu plong tơnăng ká xuân troh kơno môi tiah rêm hâi. Bu phá, a kông kơno kơdrâm tơ’nôm kơmăi koai, on tơhrik trâ bâ, ngê̆ sih ƀă hrĭng ngế tơmối. Mâu ngế hmâ ƀă tơdroăng rêh ối tơniăn lĕm dêi pơlê tơnăng ƀă păn ká xi xŏng kố chiâng ‘’diên viên’’ ối tung xiâm tơdroăng hơ’muăn tiah hmâ dêi tơná. Mâu ngê̆ sih tiô kuăn pơlê tơnăng ká xi xŏng lo a têa kơxĭ, mui ngăn san hô, prôk tung dế mâu kơtâu kŭn dêi rơlố, tơpui ƀă kuăn pơlê tơnăng ká xi xŏng a pơlê. Kong hiăng măng, môi tíu mơđah tơbleăng âm nhak po a kĭng rơlố mơhnhôk rơpâu ngế kuăn pơlê ƀă tơmối.

Ôh tá xê to môi tơdroăng xah hêi, Nhơn Châu rôh apoăng châ rơtuh ngế ngăn tung lâp tơnêi têa ‘nâi troh ƀă mâu um méa ki ai khât ‘na kuăn mơngế ƀă tơdroăng rêh ối tíu rơlố hơngế. Nâ Hồ Thị Đoan Trang, kuăn pơlê thôn Tây, cheăm Nhơn Châu, tối ăm ‘nâi kuăn pơlê sôk ro drêng pơlê xiâm tơná châ mơ’no tung um tơvi ƀă ai rôh trâm mâ tơpui tơno ƀă mâu ngê̆ sih.

“Á sôk ro ‘nâng xua hiăng ton rơlố nếo ai môi tơdroăng kân ƀă mơhnhôk hên tơmối troh ƀă rơlố Cù Lao Xanh dêi á. Á pói tơngah cho rơlố kô ai hên tơdroăng ki kal tâ mê nếo vâ mơnhông ôm hyô’’.

Pôa Nguyễn Tiến Dũng, Kăn pơkuâ hnê ngăn Đảng ủi cheăm Nhơn Châu tối ăm ‘nâi, tơdroăng ki pơhlêh ing tơdroăng xah hêi păng ‘nâng gum um méa rơlố châ troh rơdâ lâp lu tung mâu um tơvi, hyôh măng internet, mơhnhôk tơ’nôm hên tơmối troh ngăn a pơlê:

“Tung tơdroăng ‘’Say Hi eăng krip’’ pơla kố nah a mâu rơ’jíu, um tơvi, hyôh măng internet, hên kuăn pơlê ƀă tơmối ‘nâi troh Nhơn Châu hên. Á pói vâ Nhơn Châu ƀă tơdroăng ki kal ƀă rôh tơ’lêi dêi tơdroăng kố mơhnhôk kơdrâm tơmối vâ mơđah tơbleăng um, kuăn mơngế, tơdroăng rêh ối a pơlê ƀă kong kế tíu kố vâ mơnhông tung la ngiâ’’.

Rơtế ƀă mâu tơdroăng um tơvi mơ’no khât, Gia Lai xuân dế hơ’muăn mâu tơdroăng hơ’muăn dêi tơná ƀă um. Teăng bro um tung bêng koai đi đo, hên khu pro phim rah xo mâu tíu ki lĕm ƀă tơdroăng Tây Sơn vâ vêh mơhno môi hneăng rôh ton nah khên tơnôu. Đông lêng tuăn pâ khu lêng, tíu pơtâp lêng, kơdroăng păn sêi lơ hngêi phâk châ pro dâi lĕm ôh tá xê to vâ gum tung koai phim.

Klêi kơ’nâi ƀô̆ phim kêi đeăng, tâi tâng tíu kố kô châ rak môi tiah phim po, tíu tơmối kô chiâng mot tung tơdroăng rôh ton nah, châ tâ khôi túa lĕm tro ƀă ti tăng plĕng tơ’nôm kơpong tơnêi châ ngăn cho ki xiâm dêi tơchok Tây Sơn. Pôa Võ Đức, Ngế ki bro hnê mơhno dế pêi pro môi tơdroăng tơkêa bro điê̆n ảnh a cheăm Tây Sơn tối:

“Ngin vâ châ achê ƀă mâu ngế ki ngăn ƀă mơngiơk nếo tiô a mâu tơdroăng ki ai khât vâ mơngế ki đong châ achê, ai tơdroăng ki tơmiêt pói vâ tiah hmâ tơdroăng rêh ối, achê tâ ƀă rêm ngế. Tung tơdroăng rôh kố châ bro vâ ăm tơmối, xuân môi tiah tơmeăm kơnía kŭn ki khu phim ăm pơlê xiâm dêi tơná’’.

Tâng điê̆n ảnh rak mâu tơdroăng tơbâ mê tơdrá prôa pơtối lôu péa djâ mơngế ối nếo troh ƀă Gia Lai. Mega Concert (Gia Lai – Kơpong kân rơdâ troh têa kơxĭ ngiât lĕm” tung leh pơxiâm po Hơnăm Ôm hyô Tơnêi têa 2026 tơkŭm po a kơphô̆ têa kơxĭ Quy Nhơn hiăng tơkŭm hên ngê̆ sih ki ô eăng, mơhnhôk dâng 70.000 ngế ngăn ing hên kong pơlê, pơlê kong kơdrâm. Hên ngế rôh apoăng troh Gia Lai xua môi kơmăng nhak, laga kơ’nâi mê mơdoh tơ’nôm chô ngăn têa kơxĭ, kong ƀă khôi túa lĕm tro pơlê. Ngế ối nếo Lê Thanh Phương Hạ, tối ăm ‘nâi:

“Á ối a Nha Trang, rôh apoăng kơpong peăng tơdế Tơnêi têa á ai môi concert kân môi tiah mê, xua mê á kô thế prôk lăm ngăn’’.

Mâu tơdroăng hơ’muăn châ hơ’muăn ƀă um tơvi, điê̆n ảnh ƀă tơdrá prôa dế djâ châ tơƀrê inhên ăm tơtêk ôm hyô kong pơlê Gia Lai. Krê khế 7/2026, kong pơlê tơdah dâng 1,8 rơtuh rôh tơmối, tâk 40% tâng pơchông ƀă rôh kố hơnăm hdrối. Troăng vâ pêi 7 khế  châ lối 10,55 rơtuh rôh tơmối. Tung mê, tơmối lâp plâi tơnêi tâk dâng 77%. Pêi lo liăn ing ôm hyô châ vâ chê 23.000 rơtal liăn, tâk 22%.

Kơ’nâi mâu kơxô̆ ki mê cho tơdroăng pơhlêh tung troăng pêi ôm hyô: ing mơđah tơbleăng tíu troh tơmiât pêi rơkê châ tâ châ hlo; ing tơbleăng kong kế lĕm chiâng hơ’muăn mâu tơdroăng pro tơmối vâ xêh tơná troh lăm ngăn. Pôa Hà Văn Siêu, Phŏ Kơ koan xiâm Kơ koan xiâm pơkuâ Ôm hyô Tơnêi têa Việt Nam tối, kong pơlê Gia Lai pơkâ mơnhông troăng pêi nếo kố:

“Gia Lai thế pro ti lâi râng chêng tơmối ton tâ ƀă mâu tơdroăng châ tâ trâu tâ, tơmâng mâu tơdroăng hơ’muăn pro mơngế hâk vâ ƀă ai ki tơviah tâ ‘na môi tíu troh. Gia Lai xuân thế xúa mâu tơdroăng kŏng ngê̆ vâ ‘noăng chư chêh kế tơmeăm khoăng ôm hyô. Pin xúa kŏng ngê̆ hơ’muăn tơdroăng pro vâi hâk vâ ‘na Gia Lai kô cho troăng pêi la ngiâ, pơkâ ƀă hnoăng cheăng châ pơkâ ăm kơvâ ôm hyô Gia Lai tối krê ƀă Việt Nam tối tơdjuôm tung la ngiâ’’.

Gia Lai dế rak môi troăng prôk tung kơmăi kơmok xah hêi ôh tá xê to vâ mơjiâng mâu tơdroăng ki kal bu mê pơla tê, mê cho vâ rêm tơdroăng mơ’no tung um tơvi, rêm ƀô̆ phim, rêm kơmăng tơdrá prôe chiâng môi rơkong krếo ti tăng plĕng kơpong tơnêi. Ƀă drêng kuăn pơlê chiâng ối tung mâu tơdroăng ki mê, ôm hyô ôh tá xê to châ tơbleăng, mê ối châ tơbêng ƀă xiâm kối khôi túa ƀă tơdroăng ki tơbâ dêi pơlê pơla.