Tơkâ luâ luâ mâu tơdroăng tơplâ tơplong kong mêi kong tô, thôt Pô Sah Inư xuân ối tâng tơdrăng lĕm môi tiah vâ mơhno tơmeăm khoăng ki krá kâk hiăng ton tĭn, xuân ối rak vế ki krip kơnía túa lĕm tro tơviah dêi kuăn ngo Chăm kơpong tơnêi Bình Thuận ton, nôkố cho kong pơlê Lâm Đồng. Tung mâu hơnăm hdrối mê hía nah, tơdrêng ƀă tơdroăng pơtối rak vế tơmeăm khoăng ton nah, mâu tơdroăng pêi pro mơhno ăm hlo túa lĕm tro châ tơkŭm po đi đo, malối a rôh ai tơdroăng pro leh mơdĭng, rôh Têt, a rơnó khía rơxăm, rơnó mơdrăng hiăng veăng pro hên ngế troh lăm ngăn tíu tơbâ thôt Pô Sah Inư. Pôa Nguyễn Anh Tuân, Tơmối lo ing kong pơlê An Giang ăm ‘nâi:

“Á hlo tíu tơbâ ton nah dêi Chăm mê lĕm, kal thế pơtối rak vế mâu tơmeăm túa lĕm tro ăm hên rơpŏng hdroâng mơngế Việt Nam xo ah hmôi vâ pơtối ‘mâi rơnêu rak vế ilĕm”.

Tíu tơbâ thôt Pô Sah Inư, cho môi tíu tơbâ tơmeăm khoăng ‘na hngêi trăng, tiô tơdroăng loi tĭng dêi hdroâng kuăn ngo Chăm ối châ pơtối rak vế môi tiah nah. Ƀă tơmeăm khoăng mơjiâng pro tiô túa lĕm tơviah, thôt Pô Sah Inư hiăng châ pơxá cho tíu Tơbâ dêi tơnêi têa ƀă nôkố cho môi tung tíu ôm hyô ki tơ’mot hên tơmối tung tơnêi têa ƀă kong têa ê troh ngăn.

Troh nôkố, tơmối ối châ ngăn túa xuăng Aspara dêi mơngế Chăm. Mâu túa xuăng rơtế hlối rơhdruê, tơdrêng ƀă idrâp rêi mâu prôa, tơgôu hơkâ, hlŭm khiê̆n tiô tơdrá ton nah dêi mơngế Chăm, mê cho: Hơkâ ghinăng, hơkâ paranưng, khiê̆n Sarani ƀă hên idrâp ki ê pro ăm mơngế ki hmâng tâ ro. Pakĭng mê, tomối ối châ ngăn tơdroăng cheăng meăn pro tơmeăm ƀă tơnêi hneăn tiô chal krâ nah dêi mơngế Chăm. Pôa Bá Sinh Tý, Khu hơdruê xuăng tiô chal krâ nah dêi Chăm a Pô Sah Inư ăm ‘nâi:

“Khu hơdruê xuăng tiô chal krâ nah dêi Chăm mơđah akố hiăng ton sap ing nah. A hmâ mơđah hơdruê xuăng tiô idrâp proâ hơkâ khiê̆n dêi chal vâi krâ nah dêi kuăn ngo Chăm, tomối rơhêng vâ ngăn. Drêng lăm troh a thôt, tơmối khât ngăn vâi mơđah hơdruê xuăng tiô khôi túa Chăm”.

Tơdrêng ƀă tơdroăng rak vế tơmeăm khoăng ton nah, mâu hơnăm achê pơla kố Khu rak ngăn tíu Tơbâ thôt Pô Sah Inư hiăng tơmâng khât tung ‘mâi rơnêu pro lĕm ƀă mơjiâng hên túa xah hêi ăm tơmối vâ ngăn. Nâ Châu Thị Cẩm Tú, tơmối lo ing kong pơlê Vĩnh Long tối:

“Á tâ troh akố lĕm rơhĭng, ôh tá pơ’lok ƀă ai ki tĭng ‘na tuăn loi. Á hlo akố kuăn mơngế pâ hlế kơ tơmối, tơpui rơkê há ôh tá pơrah ngế ki lâi. Á ƀă rơpŏng hngêi á nhoăm khíu ƀă á tâ hơniâp tung hiâm mơno ‘na tơdroăng mê”.

Tơdroăng tơkŭm pơla lăm ngăn, tăng ‘nâi plĕng tơdroăng ton nah hmâng ‘na tơdrá hơdruê, idrâp prôa, rơ-rêk hơkâ, tơdrá khiê̆n tiô tơdrá ton nah hiăng veăng pro tơmeăm khoăng tơdroăng ôm hyô ai ki lĕm krê xêh. Thôt Pô Sah Inư kân krip cho tíu ki hên ngế troh ngăn vâ hlo ki tơviah ton nah, túa lĕm tro ƀă tiô tơdroăng loi tĭng dêi mơngế Chăm a kơpong tơnêi Peăng mâ hâi Lo Lâm Đồng, thăm rế tơ’mot hên tơmối troh lăm ngăn a tíu kố.