Ƀă dó inâi "Tơdjêp pơlê pơla - Mơhno túa lĕm tro", kố cho hâi leh ki apoăng châ tơkŭm po klêi kơ'nâi cheăm Phú Túc châ mơjiâng nah, vâ veăng kum rak vế, mơnhông mơhno túa lĕm tro mâu hdroâng kuăn ngo rơtế ƀă tơbleăng tơmeăm pêi lo ing chiâk deăng, tơmeăm ki châ inâi OCOP dêi cheăm. Hâi leh ai tơdroăng ki veăng dêi 14 khu lo ing mâu thôn, pơlê tung cheăm, rơtế ƀă 3 khu tơ'noăng lo ing mâu cheăm Ia Rsai, Ia Dreh ƀă Uar.

Cho môi tung mâu khu ki ai hên ngế veăng xah ôm hêi akố, ƀuôn Čư̆ Ung mơhnhôk lối 60 ngế ngê̆ nhân, ngế tơ'noăng ivá ƀă mâu ngế ki kơhnâ hbrâ rơnáu ăm hâi mơdĭng. Ki xiâm dêi khu a hâi mơdĭng mê cho vêh pro tơdroăng ôu drôu 3 - môi túa ki mơhno túa lĕm tro dêi mơngế Jarai. Pôa Nay Noar - Ngê̆ nhân ƀuôn Čư̆ Ung tối:

“Pơlê ngin veăng a hâi mơdĭng Mơhno túa lĕm tro hdroâng kuăn ngo pro hngêi mơdĭng ôu drôu 3, tơkŭm po vâ kuăn cháu la ngiâ vâi kô 'nâi túa ôu drôu 3 dêi mơngế Jarai môi tiah lâi. Pơlê ngin mơhno túa ôu drôu 3".

Tơdroăng ki hơniâp ro, krip krih dêi Hâi mơdĭng Mơhno túa lĕm tro -Tơ'noăng ivá mâu hdroâng kuăn ngo cheăm Phú Túc ôh tá xê to tơkŭm po a kŏng viên Phú Túc mê ối po hơniâp ro a drô troăng kơphô̆. Mâu tơdroăng ki prôk pơtăng drô troăng kơphô̆, mơđah tŏn chêng koăng, kơhnhon xuăng mơjiâng chiâng tơdroăng ki hơniâp ro ó khât. Mâu tơdroăng ki tơ'noăng ivá tiô khôi vâi krâ nah môi tiah pêi báu péa to drâi, tơhrot kơxái, kơ'nŏng kơxâk, to chĕng klĕng ƀă tơdroăng ki mơđah tơbleăng sâp rơnuâ ếo pơtâk hdroâng kuăn ngo tơ'mot hên kuăn pơlê tung cheăm ƀă tơmối ing mâu kong pơlê rơhêng vâ ngăn. Um méa ki tơviah má môi cho mâu tơdroăng sâp rơnuâ, mơđah tơbleăng ếo pơtâk hdroâng kuăn ngo, veăng kum pơ-ô pơ-eăng mơhno ki kơnía dêi ếo pơtâk tiô khôi hmâ ƀă mơhno khôi túa lĕm tro dêi hdroâng Jarai. Nâ Nay H'Dơ lo ing thôn Lâm Viên tối ăm 'nâi:

“Khu ki mơđah ếo pơtâk dêi ngin ai 7 ngế. Ai 2 khu ngế kơdrâi xâp ếo pơtâk tiô khôi hmâ vâi krâ nah. Ƀă môi khu ngế kơdrâi xâp ếo tiô chal nếo. Ing mê ăm rêm ngế hlo tiah kố, maluâ tơdroăng rêh ối chal vâi krâ nah lơ chal nếo, ếo pơtâk kô phá tơ-ê dêi pó, la xuân ối rak vế ki lĕm tro dêi kuăn ngo ngin".

Pakĭng mâu tơdroăng mơhno túa lĕm tro - tơ'noăng ivá, Kơchơ tê tơmeăm pêi lo ing chiâk deăng OCOP cheăm Phú Túc ối ai 24 kơbong tê tơmeăm dêi 14 khu lo ing mâu thôn, pơlê, mơđah tơbleăng hên tơmeăm kơchâi kâ tiô khôi vâi krâ nah ki kơhiâm, hơ-iâ lĕm, môi tiah: ro têng môi hâi tô, í pôh ƀă tơxông prông, we (kơchâi kâ tiô khôi vâi krâ nah), drôu xiâm, trŏng xăng hlá pôm loăng, trŏng kâm ƀă kéa ro, ká rơbông Sông Ba pôh… tơ’mot kơdrâm kơdrĕng khu tơmối ƀă kuăn pơlê lăm ngăn, rôe mơnúa, kâ ngăn. Pôa Ngô Đức Mạo - Kăn pơkuâ Tíu xiâm Mơhno túa lĕm tro, Tơbleăng tơdroăng kal ƀă Tơ'noăng ivá cheăm Phú Túc, kong pơlê Gia Lai mơnhên Hâi mơhno túa lĕm tro - Tơ'noăng ivá mâu hdroâng kuăn ngo ƀă Rôh po kơchơ tơmeăm pêi lo ing chiâk deăng, tơbleăng tơmeăm OCOP cheăm Phú Túc rôh má I hơnăm 2026 djâ troh hên tơdroăng mơhno túa lĕm tro ki kơnía má môi. Tung Tíu mơhno túa lĕm tro, mâu ngê̆ nhân vêh mơđah tơdroăng rêh ối pơlê pơla, mơđah tŏn chêng, tĕn hmôu, tơ'noăng pế hmê, tĕn ếo pơtâk, pong rơgi loăng ƀă mơđah tơbleăng tơmeăm pêi lo ing chiâk deăng, tơmeăm xah hêi tiô khôi vâi krâ nah. Ing mê, veăng kum rak vế, mơnhông khôi túa lĕm tro mâu hdroâng kuăn ngo, mơđah tơbleăng um méa kơpong tơnêi, kuăn mơngế ƀă mâu tơmeăm khoăng ki lĕm tro má môi dêi cheăm Phú Túc, Gia Lai.

"Sap ing pơxiâm pêi cheăng dêi khu kăn pơkuâ péa râ troh nôkố, tơdroăng cheăng mơhno túa lĕm tro, tơ'noăng ivá a pơlê cheăm hiăng kơdroh hên. Xua mê, hơnăm kố ngin tơbleăng ăm Vi ƀan cheăm tơkŭm po Hâi mơhno túa lĕm tro - Tơ'noăng ivá mâu hdroâng kuăn ngo vâ rak vế, mơnhông mơdêk khôi túa lĕm tro dêi hdroâng kuăn ngo Jarai tung pơlê cheăm. Maluâ tơdroăng cheăng kâ ối trâm hên xahpá, tơdroăng tơkŭm po a râ cheăm, la troh a chôu phut kố mâu thôn, pơlê pơrá hâk vâ, kơhnâ pơtâp, hbrâ rơnáu tơmeăm. Hâi mơhno túa lĕm tro - Tơ'noăng ivá chiâng tơdroăng ki xiâm vâ veăng kum rak vế, mơnhông mơdêk khôi túa lĕm tro dêi hdroâng kuăn ngo Jarai."

Hâi mơdĭng Mơhno túa lĕm tro - Tơ'noăng ivá mâu hdroâng kuăn ngo ƀă Rôh po kơchơ tơmeăm pêi lo ing chiâk deăng, tơbleăng tơmeăm OCOP cheăm Phú Túc rôh má I hơnăm 2026 hiăng veăng 'no hnoăng mơnhông mơdêk tơdroăng rêh ối dêi kuăn pơlê mâu hdroâng kuăn ngo. Tơdroăng tơrŭm pơla rak vế khôi túa lĕm tro ton nah ƀă tơbleăng tơmeăm pêi lo ing chiâk deăng, kế tơmeăm ki kơhiâm hiăng veăng 'no hnoăng thăm tơrŭm môi tuăn pơlê pơla mâu hdroâng kuăn ngo, tơdrêng amê hlối pro ivá mơnhông ôm hyô krá tơniăn ăm pơlê cheăm.