-Leh tơbleăng Sầu riêng Dak Lak hơnăm 2026 ai 17 tơdroăng po ki xiâm. Ki má môi mơtiah: leh pơxiâm po a Plông kân 10/3; Tơkŭm mâu tơmeăm ing plâi sầu riêng tơniăn; leh tơbleăng kế kâ tơmiât la ngiâ mơnhên ki kân má môi sap nah tá hâi chói ai a Việt Nam ƀă 102 kế kâ pro sầu riêng; kơpong mơđah tơbleăng kơvâ sầu riêng ƀă tơmeăm OCOP; mâu tour châ tâ châ hlo kơdrum sầu riêng ƀă ôm hyô mơhno khôi túa lĕm tro - mâu tơmeăm kâ, têa ôu ki ai tơdjâk ing sầu riêng; rơtế ƀă hên tơdroăng ngê̆ thuât, mơđah tơbleăng ƀă mơhnhôk mơ’no liăn tê mơdró...

-Ki nhên, kơpong mơđah tơbleăng kơvâ sầu riêng ƀă tơmeăm OCOP ai 310 tíu mơđah tơbleăng tơmeăm. ‘Na ôm hyô, mâu khu tê mơdró tơkŭm po 8 tơdroăng châ tâ châ hlo. Tơdroăng ăm prôk lăm 500 rơxế ƀăn taih mơđah tơbleăng sầu riêng ƀă troăng prôk ing Krông Păk troh Ƀuôn Ma Thuột. Tơdroăng po kân nhak xah hêi ƀă mơđah tơbleăng kế kâ tơbleăng 102 kế kâ pro ing plâi sầu riêng. Tơ’noăng kơtâu Tuy Hòa 2026 ‘’Tơdah mâ pơxiâm lo a têa kơxĭ’’ hiăng mơhnhôk dâng 2.600 ngế tơ’noăng kĭ...

-Leh tơbleăng Kế kâ Sầu riêng Dak Lak châ tơkŭm po a Kơdrum Tơdroăng tơkêa bro Eco Palace, bêng Ƀuôn Ma Thuột. Akố ối tơbleăng tơmeăm pêi lo ing chiâk deăng, tơmeăm ki má môi dêi kong pơlê, tơmeăm ôm hyô, khôi túa lĕm tro Tây Nguyên, pơlê tiô khôi vâi krâ nah ƀă mâu kơchâi kâ, kế ôu pro ing sầu riêng. Pakĭng po mâu tơdroăng kế kâ, leh tơbleăng ai mâu tơdroăng mơđah tơbleăng chêng koăng, tôu prôa têng nêng, t’rưng, prôa không Tây Nguyên, kơhnhon xuăng, xah hêi tiô khôi vâi krâ nah, kơchuâ um troăng kơphô̆ ƀă mâu tơdroăng po xah tơdrá prôa... Tơmối xuân châ hlo, châ ôu kế ôu tê kơtê pro ing sầu riêng, tung mê ai kơphế sầu riêng ƀă chếi têa tôu sầu riêng.

-Pôa Lê Hoàng Cơ, Kăn pơkuâ Dam San Tourist, Kăn pơkuâ Khu tơkŭm po Leh tơbleăng Kế kâ Sầu riêng, tối ăm ‘nâi, mâu ngế ki pế pơchên, pro kế kâ dêi 20 khu tơ’noăng ing lâp tơnêi têa kô veăng pro ƀă mơđah tơbleăng “102 kế kâ ai tâ plâi Sầu riêng Dak Lak”. Tơdroăng kố mơjiâng lêh ki ro kân má môi sap nah tá hâi chói ai a Việt Nam.

“Sầu riêng cho môi tơmeăm pêi lo ing chiâk deăng rơtal dollars xua mê, pin thế mơdêk râ a ‘ngêi, pakĭng xúa ki ai xêh mê pin thế uâ bro. Drêng châ mơnhên kih luk 102 kế kâ ƀă sầu riêng mê tơdroăng ki lôi ăm má mơ’nui cho pin po châ mâu hngêi tê mơdró, mâu hngêi pro kế kâ sầu riêng a mâu kong pơlê, thăm nếo tung tơnêi têa ƀă lâp plâi tơnêi’’.

- Môi tơdroăng tiô tối hdrối châ Guinness lâp plâi tơnêi mơnhên cho leh ki kân sap nah tá hâi chói ai cho ăm khu rơxế kân ƀăn taih prôk lăm drô troăng kân pơto sầu riêng ing Krông Pắc troh a Tíu xiâm Hơlâ 6 troăng ƀă mâu troăng kơphô̆ dêi tíu pơlê kân Ƀuôn Ma Thuột. Khu rơxế kân ƀán taih pơto sầu riêng prôk lăm a Leh tơbleăng sầu riêng Dak Lak 2026 ai 500 toăng rơxế, rêm rơxế pơto 200 kilô sầu riêng. Khu rơxế prôk ing Plông kân Tân An, cheăm Krông Pắc, prôk lăm tiô Troăng kân tơnêi têa 26, kơ’nâi mê mot a Troăng kân Tơnêi têa 27 ƀă troh a troăng kân Đăi lô̆ Võ Nguyên Giáp. Khu rơxế kô pơtối prôk tơkâ hluâ Tíu xiâm Hơlâ 6 troăng ƀă mâu troăng kân tung Ƀuôn Ma Thuột.

-Jâ Trần Vũ Thùy Linh, Phŏ Kăn pơkuâ Khu tơkŭm po khu rơxế prôk pơtăng lăm drô troăng kân, tối ăm ‘nâi, Khu tơkŭm po hiăng tơdah kĭ lối 600 khu ai rơxế kân ƀăn taih, tơkâ hluâ pơkâ thế lối 100 rơxế. Tơkŭm po Guinness xuân hiăng pơtroh ngế teăng mâ troh Dak Lak vâ tơrŭm, tơkŭm pro mâu mơ-éa mơnhên kân má môi.

“Hnoăng cheăng ki vâ pro leh ki kân sap nah tá hâi chói ai kố tung Guinness pơkâ cho kân krip, ing kơxô̆ plâi sầu riêng tung rơxế thế cho tơmeăm ki khât 100% troh tơdroăng mơngế ki veăng thế ai tŭm inâi, hơnăm ƀă inâi mâu ngế vê rơxế. Nôkố Khu tơrŭm Sầu riêng kong pơlê Dak Lak hiăng pêi pro tŭm mâu mơ-éa kố. Pakĭng mê, Khu tơrŭm xuân hiăng krếo môi ngế ki rơkê hriăn plĕng ối tung Guinness troh tơdrêng a Dak Lak vâ mơnhên. Klêi tơdroăng ki kal kố dâng 30 phut, vâi kô séa ngăn, vêh mơnhên môi xôh nếo. Tâng ôh tá ai trâm pá ki klâi, leh ki kố kô châ mơnhên kân má môi tơdrêng mê hlối’’.

Tiô khu tơkŭm po, leh mơđah tơbleăng Sầu riêng Dak Lak hơnăm 2026 ôh tá xê to mơđah tơbleăng inâi sầu riêng mê ối tơmiât troh mơjiâng mâu kế kâ, tơmeăm ôu kơvâ cheăng, thăm mơdêk tơrŭm pêt – tê, tơ’mot khu ‘no liăn pêi cheăng tung uâ pơliê, logistics ƀă mơjiâng pro ôm hyô pêi chiâk deăng. Dak Lak dế rế hía rế djâ Mơđah tơbleăng Sầu riêng chiâng tơdroăng ki kal râ tơnêi têa, prôk troh kong têa ê.

-Pôa Trần Hồng Tiến, Kăn pơkuâ Khu ngăn túa lĕm tro, Tơ’noăng ivá ƀă Ôm hyô kong pơlê Dak Lak ăm ‘nâi, mâu tour ki lăm a kơdrum plâi sầu riêng châ mơjiâng pro ôh tá xê vâ ăm lăm ngăn to tung rôh po mơdĭng mê kô châ hriăn plĕng vâ chiâng tơmeăm ôm hyô ki đi đo, veăng gum ăm sầu riêng chiâng tíu troh ôm hyô rêm hơnăm dêi Dak Lak.

“Mâu tour kố ôh tá xê to gum ăm tơdroăng ki vâ lăm ngăn tung rôh po mơdĭng mê xo ah hmôi kô châ hriăn plĕng, mơnhên tối mâu tour ôm hyô ki đi đo rêm hơnăm. Mơni kô ai mâu hơnăm ôh tá tơkŭm po mơđah tơbleăng, la vâ rêm ngế troh a Dak Lak vâ châ lăm ngăn troh a mâu tíu pêt, châ mơnúa kâ ngăn, ngăn túa pêt, uâ pơliê, krí xo, tâ tung kơthung. Klêi kơ’nâi po mơdĭng ngin rơhêng vâ rêm rơnó sầu riêng cho rêm ngế kô pâ troh ƀă kô lăm ôu hyô troh a Dak Lak”.

-‘Na ki tơƀrê khât dêi Mơđah tơbleăng Sầu riêng Dak Lak hơnăm 2026 ƀă kuăn pơlê ki pêi chiâk, malối cho tơdroăng ki vâ po rơdâ kơchơ tê, tơ’mot ‘no liăn cheăng, pơkâ mơdêk tê mơdró ƀă mâu tơdroăng pơkâ pêi mơnhên tối drêng po mơđah tơbleăng mơgêi, jâ Đặng Thị Thủy, Phŏ kăn pơkuâ Khu ngăn chiâk deăng Hyoh kong prâi kong pơlê Dak Lak ăm ‘nâi:

“Khu ngăn ‘na chiâk deăng ƀă Hyôh kong prâi hiăng ai mâu troăng pơkâ pêi pro nhên vâ tí tăng ‘nâi plĕng ăm Vi ƀan hnê ngăn kong pơlê mâu troăng hơlâ tŭm têk dêi mâu kơvâ cheăng tung pơkuâ ngăn plâi sầu riêng. Ngin dế tí tăng ‘nâi plĕng Vi ƀan kong pơlê pơkâ túa pơkâ mơdêk rơdêi pơhlêh xúa internet, tung mê ai tơdroăng pêi thâ 30 hâi măng. Má péa, cho pêi pro troăng hơlâ séa ngăn, nôkố mê ƀă cheăng hbru ăm mah kơxô̆ kơpong pêt ƀă tíu tâ tung kơthung mê ngin hiăng mơdêk rơdêi, pro tiah lâi vâ ví lu lêa tung mah kơxô̆ kơpong pêt”.

-Kong pơlê Dak Lak nôkố ai vâ chê 45.000 ha sầu riêng, châ lối 1/5 ƀăng tơnêi pêt sầu riêng tung lâp tơnêi têa. Hơnăm 2025, plâi sầu riêng dêi kong pơlê châ 390 rơpâu tâ̆n, ki kơnâ tê ngi kong têa ê châ dâng 1,1 rơtal USD, ăm sầu riêng chiâng môi tung mâu kơvâ pêi chiâk deăng xiâm dêi kong pơlê. Peăng parŏng mâu kơxô̆ ki mê cho tơdroăng rêh kâ ối dêi lối chât rơpâu rơpŏng, cho tơdroăng pơhlêh dêi hên pơlê cheăm ƀă mâu tơdroăng ki vâ rak vế, mơdêk mâu tơdroăng ki kơnía túa lĕm tro.

Leh tơbleăng Sầu riêng Dak Lak 2026 ôh tá xê to ô eăng hdrê plâi ki kố, mê ối tối nhên tơdroăng púi rơhêng vâ mơjiâng inâi tơmeăm pêi lo ing chiâk deăng tro ƀă túa lĕm tro Tây Nguyên, mơjiâng pro ôm hyô ƀă mơdêk ki kơnía rế tâk dêi kơvâ cheăng rơtal dollars. Drêng mâu idrâp chêng koăng châ chuât xơtó tung rơnó plâi sầu riêng tum, mê xuân cho rôh Dak Lak hơ’muăn ăm vâi pú tung tơnêi têa ƀă kong têa ê tơdroăng ‘na môi kơpong tơnêi pơhlêh ki pơxúa pêi chiâk deăng chiâng ivá mơnhông cheăng kâ rêh ối pơlê pơla.