Sap ing kơxo má, Kơno tuk Phan Thiết hiăng kơdrâm kơdrĕng. Mâu plong tuk châ rơnuâ hlá cờ ‘nhíu, kơdrế, hơkâ, chêng, koăng; mâu vâi krâ tung ếo xŏn, kên kluôp ko tơkŭm hbrâ ăm tơdroăng mơdĭng. Tro klăng 7 chôu, khu plong lo ing kơno, prôk troh a Hòn Lao pêi pro tơdroăng mơdĭng tiô khôi vâi krâ nah, klêi mê vêh a kơno Cồn Chà. Ing kố, hrĭng ngế pơtối rơtế prôk tơkâ luâ mâu troăng kĭng têa kroăng Cà Ty, hdrối vâ vêh a Dinh Vạn Thủy Tú pêi pro klêi tơdroăng mơdĭng.

Leh tơdah Lệnh Ông Sanh rơtế ƀă tơdroăng loi tĭng xối xeăng Nam Hải, lơ ká Ông, nâl pin cho Ká Rui dêi kuăn pơlê a kĭng têa kơxĭ. Ing leh mơdĭng, kuăn pơlê tĭng rơkâu pâ tơnêi têa tơniăn lĕm, têa kơxĭ tơniăn, khía tơtro, plong tuk lo lăm tơnăng ká tơniăn, tơnăng châ ká xixŏng hên. Pôa Phạm Triều, kuăn pơlê tơnăng ká xi xŏng ai lối 45 hơnăm hmâ ƀă têa kơxĭ, tối:

"Hâi mơdĭng kố ai pơxúa ƀă kuăn pơlê ngin, cho khôi túa vâi krâ nah troh nôkố. Troh hâi Tĭng rơkâu xối a kĭng têa kơxĭ, vâi krâ-nhŏng o rơkâu ăm tơnêi têa tơniăn, pêi cheăng kâ tơniăn, lăm a têa kơxĭ tơniăn lĕm, châ xo hên kế tơmeăm, trâm hên tơdroăng pon mơhúa".

Rơtế ƀă tĭng rơkâu, tơdroăng leh a Dinh Vạn Thủy Tú ối ai tĭng tiên yết, giỗ sắc, xối âm linh, tĭng bế hoàn ƀă tĭng kơ’nêi reăng on a têa kroăng Cà Ty. Tơdroăng xah hêi ai hơdruê bả trạo, hơdruê ƀội, hơdruê bài chòi, kơhnhon xuăng – pơmôm – prếo, tơdroăng xah hêi tiô khôi vâi krâ nah, kơhnhon xuăng drô troăng kơphô̆, kơchơ tê mơdró ƀă tíu ôu kâ kơchâi kâ ki phá tơ-ê Phan Thiết. Ing mê, kuăn pơlê ƀă tơmối ai tơ'nôm rôh vâ tí tăng 'nâi plĕng tơdroăng rêh ối, loi tĭng ƀă túa lĕm tro dêi kuăn pơlê kơpong têa kơxĭ. Pôa Đào Quang Thanh, Kăn phŏ hnê ngăn Vi ƀan bêng Phan Thiết, tối tiah kố tơdroăng rak vế leh mơdĭng athế 'măn chôu, rak vế kuăn pơlê tơnăng ká xi xŏng a tíu xiâm, tơdrêng amê hlối rơtế ƀă ôm hyô:

"Tơdroăng ki kal má môi cho leh mơdĭng athế châ tơkŭm po tiô tơdroăng ki rak vế khôi túa, vêa vong ƀă vâ pêi pro xêh dêi pơlê pơla kuăn pơlê ki tơnăng ká xi xŏng pro xiâm. Tơdroăng ki tơdjêp leh mơdĭng ƀă ôm hyô xuân châ pêi pro ai rah xo, rak tơniăn rế tơbleăng châ khôi túa lĕm tro têa kơxĭ Phan Thiết, rế ôh tá pro hía lôi ki khô túa ki kơnía git ƀă ki kơnâ xiâm dêi leh mơdĭng".

Tơdế tơdroăng mơnhông mơdêk túa rêh kâ ối a kơphô̆, tê mơdró ƀă ôm hyô têa kơxĭ dêi kong pơlê Lâm Đồng, mâu kuăn pơlê ki tơnăng ká xixŏng a kĭng têa kơxĭ, Dinh Vạn Thủy Tú, idrâp hơdruê bả trạo, tŏn chêng koăng ƀă khu tơdah, rơkâu xối a têa kroăng Cà Ty ối chôu vế 'na ki trâu hơngế túa lĕm tro dêi Phan Thiết. Mơdĭng rơkâu xối kơno têa xua mê ôh tá xê to rak vế tơdroăng loi tĭng dêi kuăn pơlê rôh nah rêm roh lo lăm tơnăng ká xi xŏng, mê ối pơtối mơhno khôi túa lĕm tro dêi môi kơpong têa kơxĭ, vâ mâu tơdroăng ki kơnía mê châ pơtối rak vế, tơbleăng ƀă veăng pro kro mơdrŏng tơ'nôm khôi túa lĕm dêi Lâm Đồng tung tơdroăng mơnhông mơdêk nếo.