Tơbâ 77 hơnăm hâi mố đô̆i rong châ hlâ hía, kơmăng hâi lơ 5/8 a Hngêi hơdruê kân Hà Nội, Khu veăng kum rơpŏng hngêi ki ai on veăng lơ kuăn ‘nĕng hlâ ai hnoăng Việt Nam, Tíu mơ’no um tơvi Kih thuât xô̆ VTC, Hlá tơbleăng Lao động và Xã hội (Khu xiâm ngăn cheăng pêi Mố đô̆i tro rong ƀă rêh ối pơlê pơla) tơrŭm ƀă Kŏng ti Veăng tơlo liăn Mơnhông chêh hlá tơbeăng tơbleăng Túa lĕm tro Việt Nam ƀă mâu tíu pêi cheăng ki tơdjâk troh tơkŭm po tơdroăng trâm mâ mơđah hơdruê xuăng pơxá “Ối rêh đi đo ƀă kong ngo tơnêi têa”.

Tơdroăng trâm mâ mơđah hơdruê xuâng “Ối rêh đi đo ƀă kong ngo tơnêi têa” châ tơkŭm po vâ pơtối tơdroăng “Niân troh hâi kố kơnôm ai hnoăng vâi krâ nâh’’, “Pâ mâu ai hnoăng’’ dêi hdroâng mơngế Việt Nam, pakĭng mê krếo thế rêm râ, mâu kơvâ cheăng, mâu khu tơrŭm cheăng kal kí - pơlê pơla, khu mơdró, mâu ngế tung lâp tơnêi têa pơtối tơmâng pêi pro kơhnâ khât, mơnê kơ mâu Jâ Nôu Việt Nam Khên tơnôu, mâu ngế hlâ Khên tơnôu, rơpŏng ai hnoăng - mơngế ai hnoăng ƀă kăch măng.

Ing mê, hnê tơdroăng pêi pro dêi Kăch măng, hiâm mơno pâ nhoăm tơnêi têa, hâk tơngăm ƀă mơdêk hlê plĕng hnoăng cheăng dêi rơxông nếo hâi kố ƀă xo ah hmôi ‘na tơdroăng ‘’Khoh châ niân tiah hâi kố kơnôm ai hnoăng vâi krâ nâh” dêi hdroâng mơngế Việt Nam.