Tối ‘na tơmeăm ki ai hlâu mơnhông ôm hyô tơdjêp ƀă tơdroăng châ tâ châ hlo khôi túa lĕm tro ‘na kơphế, pôa Nguyễn Thiên Văn, Phŏ Kăn hnê ngăn Vi ƀan kong pơlê Dak Lak tối nhên, kố cho môi troăng prôk ki kal kum mơdêk ki kơnâ cheăng kâ kơvâ kơphế dêi kong pơlê. Xua mê, kong pơlê dế tơkŭm tŏng gum mâu troăng pêt mơjiâng kơphế krá tơniăn, tơdjêp mơnhông ôm hyô châ tâ vâ rế rak vế khôi túa lĕm tro, rế mơdêk ki pơxúa cheăng kâ ăm kuăn pơlê.

Dak Lak kô pơtối mơ’no liăn a hngêi trăng, troăng klông, tơmeăm khoăng ôm hyô a mâu kơpong pêt kơphế ki hên, mơhnhôk tơrŭm pơla mâu khu tê mơdró ƀă kuăn pơlê pêi chiâk deăng vâ mơjiâng mâu tơmeăm ôm hyô ki má môi.