A 18h30 kơxê tiô chôu kong pơlê, Leh pơxiâm po roh mơgêi ối má môi kơtú ƀa long vâi kơdrâi lâp plâi tơnêi (FIFA World Cup Kơdrâi 2023) tơkŭm po a plông kơtú ƀalong Eden Park a pơlê kong kân Auckland, New Zealand. Ki má môi dêi Leh pơxiâm po cho mơđah hơdruê dêi nhak sih ngế kong têa Australia ƀă ngê̆ sih ngế New Zealand ƀă tơdroăng hơdruê ‘’Do It Again’’ – Tơdroăng hơdruê ki khât dêi World Cup vâi kơdrâi 2023.

Kơ’nâi leh pơxiâm po dâng 30 phut, tơkŭm po roh tơ’noăng apoăng pơla khu kơtú ƀalong kơdrâi New Zealand trâm khu kơtú ƀalong vâi kơdrâi Na Uy. Ôh tá krê New Zealand, Australia xuân cho rơtế tơkŭm po dêi rơnó tơ’noăng hơnăm kố. FIFA World Cup Vâi kơdrâi 2023 kô ai 64 roh tơ’noăng, tơkŭm po a 9 pơlê kong kân New Zealand ƀă Australia.

Hơnăm kố xuân cho roh apoăng tơ’noăng ai kơxô̆ khu veăng hên má môi cho cho 32 khu ƀă 8 khu kơtú ƀalong vâi kơdrâi roh apoăng châ veăng tung mê ai Haiti, Moroco, Panama, Philipines, Bồ Đào Nha, Kŏng hoa Ireland, Zambia ƀă Việt Nam.