VOV4.Xơ Đăng - Hiăng luâ 50 hơnăm châ hơngế ing pơlê xiâm Kon Tum troh rêh ối, cheăng kâ a kong pơlê Dak Lak mơjiâng tơdroăng rêh ối nếo, mơngế Rơteăng xuân ối rak vế dêi khôi tuá, vêa vong hdroâng kuăn ngo tơná. Ing hmân ếo, kơpĕn, pơtâk troh a kế kâ troh a tơdroăng tŏn chêng, rơngê ting ting Rơteăng.

VOV4.Xơ Đăng - Ƀă inâi “Ƀuôn Ma Thuột – Tíu tơkŭm 3 tơdroăng ki rơkê kơphế lâp plâi tơnêi” tơdroăng mơdĭng prôk a troăng kơphô̆ tung rôh po mơdĭng kơphế Ƀuôn Ma Thuột rôh má 8 hơnăm 2023 po a kơxê lơ 10/3, a 6 to hơlâ troăng Ƀuôn Ma Thuột, hiăng pơtroh mâu kuăn pơlê ƀă tơmối ai môi tơdroăng ki ngăn hơniâp ro, phiu niu.

VOV4.Xơ Đăng - Kŏng ti veăng tơlo liăn cheăng dêi Grup cheăng kâ Mih - Việt hiăng chiâng khu ki xiâm xúa ki hên má môi “Kơhôp kơphế hơ’lâk ôu hlối ki kân má môi Việt Nam”.

VOV4.Xơ Đăng - Tung tơdroăng tơkŭm po dêi Leh tơbleăng kơphế Ƀuôn Ma Thuột roh má 8 hơnăm 2023, kơxo hâi lơ 9/3, a pơlê kong kơdrâm Ƀuôn Ma Thuột, Khu pơkuâ loăng pơlái kong kế ki lĕm mơnâ mâ ngăn kong pơlê Dak Lak hiăng tơkŭm po Leh pơxiâm po mơđah tơbleăng, hneăng tơ’noăng loăng pơlái kong kế ki lĕm mơnâ mâ ngăn.

VOV4.Xơ Đăng - Kơxo lơ 9/3, Khu tơkŭm po Leh tơbleăng kơphế Ƀuôn Ma Thuột rôh má 8 tơkŭm po leh diâp pri ƀă mơđah tơbleăng um ngê̆ thuât “Kơphế Việt Nam – Troăng prôk tơmiât rơkê kế tơmeăm kơnía git mơhno túa lĕm tro lâp plâi tơnêi”.

VOV4.Xơ Đăng - Kơxo lơ 8/3, Khu pơkuâ Văn hok Ngê̆ thuât Dak Lak tơkŭm po Leh tơbâ 70 hơnăm Hâi mơjiâng Khu xup um Việt Nam ƀă mơhnhôk 2 roh tơ’noăng um ‘’Ƀuôn Ma Thuột – Dak Lak mot tơrŭm ƀă mơnhông mơdêk” ƀă “Tơdroăng tơkŭm po Leh tơbleăng kơphế Ƀuôn Ma Thuột roh má 8, hơnăm 2023’’.

VOV4.Xơ Đăng - Kơxo lơ 8/3, Tíu ‘măn rak kế tơmeăm ton nah kong pơlê Dak Lak tơkŭm po mơđah tơbleăng ‘na ếo pơtâk mâu hdroâng kuăn ngo a Dak Lak” ƀă mơđah tơbleăng tơdroăng cheăng ki hơ’lêh kơxô̆ a tíu ‘măn rak kế tơmeăm.

VOV4.Xơ Đăng - Bú ối to lâi hâi ah ‘nôi, kô po Leh tơbleăng kơphế Ƀuôn Ma Thuột roh má 8 pro a kong pơlê Dak Lak. A mâu pơlê cheăm, tung mâu hâi hdrối mê hía nah, kuăn pơlê xuân hiăng rơ-rêk tung hiâm mơno, tơkôm hmăng, hnối hbrâ mâu tơmeăm khoăng, rơnáu mâu túa lĕm tro vâ mot tung hâi Leh tơbleăng.

 VOV4.Xơ Đăng - Tiô tơdroăng hmâ loi dêi mơngế Rơđế, tơrŭm tung rơpŏng hngêi ƀă hdroâng hdrê ti xê bú châ mơjiâng pro tiô kơ tơdroăng ki tơrŭm pơla khu nhŏng o, hdroâng hdrê achê mê ối ai tơdjâk tung pơla mâu ngế ki hdrông hdrê, kuăn ngo ki ê. Tĭng pro nhŏng o mê, xuân ai tá tơdroăng  prokuăn nôu, kuăn pâ, ngoh nâ, nâ o.

VOV4.Xơ Đăng - Vi ƀan hnê ngăn pơlê kong kơdrâm Đà Lạt, kong pơlê Lâm Đồng dế mơnhông tơdroăng pơkâ mơ’no túa cheăng vâ mơnhông pêi cheăng kâ a kơmăng, tơtro tiô tơdroăng ki xah ôm hêi, rôe xúa tơmeăm khoăng, ôm hêi, pơchên hmê kơchâi kâ a kơmăng ăm kuăn pơlê ƀă tơmối.