VOV4.Sêdang - Sap hơnăm 2016, Khu kăn pơkuâ Đảng tơring Kon Plông , kong pơlê Kon Tum pơkâ Tơdroăng kơxô̆  26 tơbleăng pêi tơdroăng pơkâ dêi tơnêi têa ‘na mơjiâng thôn pơlê nếo, pơla hơnăm 2016-2020”. Kơ’nâi vâ chê 5 hơnăm tơbleăng pêi, Tơdroăng 26 hiăng pro pơ’lêh ăm hlo ngiâ méa tơ-ƀrê ‘na pêi chiâk, mơnhông thôn pơlê ƀă hiăng pơnhông tơ-ƀrê tơdroăng rêh ối dêi kuăn pơlê.

Pôa Lê Đức Tín, kăn phŏ hnê ngăn Vi ƀan tơring Kon Plông ăm ‘nâi: Vâ pêi pro hơ’lêh troăng hơlâ pơkâ dêi Khu pơkuâ ngăn Đảng tơring 'na tơdroăng mơjiâng thôn pơlê nếo, Vi ƀan hnê ngăn tơring Kon Plông hnê mơhno mâu kơ koan ki ai tơdjâk mơjiâng, veăng tí tăng ‘nâi plĕng ăm Vi ƀan hnê ngăn tơring pơkâ mâu tơdroăng tơkêa vâ tơkŭm pêi pro tiô túa ki nhên, khoa hok, mơnhên mâu tơdroăng pơkâ mê kal tối tơbleăng pêi pro rêm hơnăm ƀă tá tung hneăng; mâu hnoăng cheăng, tơdroăng pơkâ mơjiâng thôn pơlê nếo châ kơjo kum tơbleăng, pro tơdroăng ki kal vâ tơbleăng pêi pro klêi mâu tơdroăng pơkâ mơjiâng thôn pơlê nếo ki u ối tơtro ƀă tơdroăng ki ai khât dêi tơring ƀă hên ki ê.

Mơnhên hngêi trăng, troăng klông thôn pơlê cho tơdroăng ki xiâm tung tối tơbleăng pêi pro, mơjiâng thôn pơlê nếo, mơhông cheăng kâ rêh ối pơlê pơla a kơpong thôn pơlê nếo a tơring, hneăng hơnăm 2016 -2020, tơring Kon Plông tơkŭm mâu kơxô̆ liăn kơjo kum ‘no mơjiâng pro mâu kế tơmeăm hngêi trăng, troăng klông thôn pơlê.

Troh nôkố, tơring Kon Plông ai 7/8 to cheăm pêi klêi tơdroăng pơkâ kơxô̆ 2 ‘na troăng prôk, tâk 6 to cheăm; 9/8 to cheăm pêi klêi kơxô̆ 3 ‘na rơchoâ, hno têa, tâk 5 cheăm; 8/8 cheăm pêi klêi tơdroăng pơkâ kơxô̆ 4 ‘na on tơhrik, tâk 3 to cheăm; 4/8 to cheăm pêi klêi tơdroăng pơkâ kơxô̆ 5 ‘na hngêi trung hriâm, tâk 2 to cheăm; 5/8 to cheăm pêi klêi tơdroăng pơkâ kơxô̆ 6 ‘na tơmeăm xúa tung mơhno túa lĕm tro, tâk 4 cheăm tâng vâ pơchông ƀă hơnăm 2015.

Tơdrêng amê, tơring Kon Plông mơnhên tơdroăng ki mơdêk cheăng kâ, mơdêk pêi liăn ăm kuăn pơlê cho môi tung mâu tơdroăng ki kal kơjo hnê mơhno xiâm tung mơjiâng thôn pơlê nếo; tung mê, tơkŭm tơbleăng pơkâ thế vâ pro chiâng tơdroăng ki xiâm tung mơjiâng thôn pơlê nếo; tung mê, tơkŭm tơbleăng pêi pro châ tơƀrê tơdroăng ki vêh pêi kơvâ pêi chiâk deăng tơtro ƀă mơjiâng thôn pơlê nếo.

Kơnôm tiah mê, klêi kơ’nâi 5 hơnăm, veăng kum kơdroh kơxô̆ rơpŏng kơtiê kơpong thôn pơlê chu ối 14,98% (hơnăm 2020), kơdroh 39,31% tâng vâ pơchông ƀă hơnăm 2015; pêi lo liăn rêm ngế hơnăm 2020 châ 33,5% rơtuh liăn, tâk 16,74 rơtuh liăn/ngế tâng vâ pơchông ƀă hơnăm 2015.

Tơring tơtrŏng troh hnoăng cheăng hnê cheăng pêi ăm mâu ngế pêi cheăng tung thôn pơlê ƀă hiăng hnê ăm 2.282 ngế, châ 91% tơdroăng pơkâ mơ’no; tung mê hnê cheăng pêi cho pêi chiâk deăng 2.107 ngế, châ 92,3%. Malối, hnoăng cheăng hnê cheăng pêi tơtro ƀă tơdroăng ki tăng cheăng pêi hiăng veăng kum mơdêk kơxô̆ ngế pêi cheăng ki hiăng châ hnê ai cheăng pêi rế hía rế tâk hên.

Tung kơvâ cheăng hnê hriâm, mâu hngêi trung, lâm hriâm châ tơring tơmâng ngăn ‘no liăn, ‘mâi rơnêu, po rơdâ, pêi pro tro tơdroăng ki rơhêng vâ hriâm tâp dêi kuăn pơlê. 9/9 to cheăm, pơlê kân châ hnê ing râ má môi hnê mầm non ăm vâi hdrêng 5 hơnăm.

Mâu kế tơmeăm xúa, mâu ngế cheăng dêi khu pơkuâ ngăn pơkeăng a pơlê, cheăm châ ‘no liăn roê. Lâp tơring nôkố ai 9/9 to cheăm, pơlê kân pêi klêi tơdroăng ‘na khăm pơlât, châ tâi tâng mâu tơdroăng pơkâ mơ’no.

Hnoăng cheăng rak vế hyôh kong prâi đi đo châ tơmâng ngăn, tơdroăng pơkâ dêi tơnêi têa ‘na têa krúa ƀă kong prâi tơnêi tíu, thôn pơlê tơbleăng hlo tơƀrê. Troh nôkố, kơxô̆ rơpŏng xúa têa krúa, a kơpong thôn pơlê châ 98%, tâk 8% tâng vâ pơchông ƀă hơnăm 2015.

Kơnôm ing pêi pro tro mâu tơdroăng pơkâ tung tối tơbleăng, tơdroăng pêi pro thôn pơlê nếo a tơring Kon Plông tung la pơla hdrối kố nah hlo tơƀrê khât. Troh mơ’nui hơnăm 2020, lâp tơring ai 2 to cheăm pêi klêi 19/19 tơdroăng pơkâ ƀă hiăng châ Vi ƀan hnê ngăn kong pơlê mơnhên cheăm pêi klêi thôn pơlê nếo. Ki rơhêng vâ tối, tơdroăng pơkâ hiăng pêi klêi dêi cheăm cho 15,8 tơdroăng pơkâ; tâk 10,2 tơdroăng pơkâ pêi klêi tơdế tung cheăm tâng vâ pơchông ƀă hơnăm 2015.

Loi tơngah tung la ngiâ ah, tơdroăng ki tơbleăng tơdroăng pơkâ tơnêi têa mơjiâng thôn pơlê nếo dêi tơring Kon Plông pro ai pơxúa hên tơdroăng, pêi pro troh tơdroăng ki pêi klêi pơkâ mơjiâng thôn pơlê nếo a tơring tro tiô pơkâ mơ’no.

Hlá tơbeăng Kon Tum

Katarina Nga tơplôu ƀă tơbleăng