VOV4.Sêdang - Hâi lơ 12/11/2020, Ngế pro xiâm hnê ngăn Chin phuh hiăng pơkâ kơxô̆ 33/2020/QĐ - TTg ‘na tơdroăng pơkâ xing xoăng, hdró mơnhên kơpong hdroâng kuăn ngo ƀă kong ngo tiô tơdroăng mơnhông mơdêk hơnăm 2021- 2025. Kố cho tơdroăng xiâm ki kal vâ mâu kong pơlê tơbleăng tối, hnê mơhno, pêi pro tơdroăng pơkâ cheăng pơla hơnăm 2021-2025. Kố cho xiâm ki vâ mâu kong pơlê, tơring, cheăm tơbleăng mâu luât pơkâ tơtro, pơxúa, châ tơ-ƀrê ƀă tơrêm kơpong hdroâng kuăn ngo ƀă kong ngo châ tro tiô pơkâ.

Tiô Pơkâ, mâu thôn châ mơnhên cho pá puât má môi ối tung kơpong kuăn pơlê hdroâng kuăn ngo ƀă kong ngo thế cho thôn ai kơxô̆ rơpŏng hdroâng kuăn ngo tung tâi tâng kơxô̆ rơpŏng kuăn pơlê rêh ối tơniăn chiâng pơlê pơla sap ing 15% tơngi klêng ƀă tơxâng 1 tung 2 tuá pơkâ: Ai kơxô̆ rơpŏng kơtiê sap ing 20% tơngi klêng (krê ƀă kơpong tơbăng kroăng Cửu Long ai kơxô̆ rơpŏng kơtiê sap ing 15% tơngi klêng lơ lối 30 rơpŏng kơtiê cho rơpŏng hdroâng kuăn ngo kơtiê); Ai kơxô̆ rơpŏng kơtiê sap ing 15% troh pá kơdâm 20% (krê kơpong tơbăng kroăng Cửu Long ai kơxô̆ rơpŏng kơtiê sap ing 12% troh pá kơdâm 15%).

Ƀă khu ki má 2, kal tơxâng 1 tung 3 túa pơkâ (ai lối 60% kơxô̆ rơpŏng kơtiê cho rơpŏng hdroâng kuăn ngo tung tâi tâng kơxô̆ rơpŏng kơtiê dêi thôn; tá hâi ai troăng sap ing thôn troh tíu xiâm cheăm lơ ai troăng laga prôk lăm pá puât, ki má lối cho rơnó mêi; tá hâi ai on tơhrik tơnêi têa lơ hiăng ai laga lối 30% kơxô̆ rơpŏng tá hâi châ xúa troăng kơxái on tơhrik tơnêi têa).

Tơdroăng mơnhên thôn ki pá puât tiô tơdroăng mơnhông mơdêk cho xiâm kối mơnhên khu mơngế, cheăm, pơlê vâ pêi pro mâu tơdroăng pêi, troăng hơlâ kum hdroâng mơngế dêi Đảng ƀă Tơnêi têa tiô rêm hneăng, tơniăn tơtro ƀă tơdroăng nôkố. Ing mê, mâu khu xiâm, kơvâ cheăng ƀă kong pơlê tơkŭm pêi pro châ tơƀrê pơkâ pêi kơdroh kơtiê krá tơniăn tung kơpong ‘’kơtiê păng ‘nâng’’ ai tơdroăng cheăng kâ – rêh ối pá puât khât.

Xo pơtih ing kong pơlê Thái Nguyên. Tiô inâi kĭ thôn ki pá puât kơpong vâi krâ hdroâng kuăn ngo ƀă kong ngo hneăng hơnăm 2021 – 2025, Thái Nguyên ai 50 thôn ki pá puât ối tung 22 cheăm dêi 5 tơring, mê cho: Võ Nhai, Định Hóa, Đồng Hỷ, Phú Lương, Phú Bình. Tung mâu cheăm, thôn, kơtâu hluăn ing pá puât păng ‘nâng dêi kong pơlê Thái Nguyên, ai hên tơring hiăng pêi kêi đeăng tơdroăng mơjiâng thôn pơlê nếo. Châ tơƀrê tiah kố kơnôm tơdroăng ki tơrŭm ƀeăn ƀĕng rơkê mâu khu râ, kơxô̆ liăn kơjo ăm mâu tơring cheăm kố, tung mê thế tối troh mâu tơdroăng mơjiâng thôn pơlê nếo, tơdroăng 135, tơdroăng tơkêa bro 2037, ing mê hiăng pơ’lêh tâi tâng tơdroăng cheăng kâ – rêh ối pơlê pơla kơpong hdroâng kuăn ngo kong ngo, pơ’lêh tơdroăng tơmiât dêi khu râ kăn pơkuâ, xuân môi tiah dêi kuăn pơlê. Pôa Nguyễn Thái Nam, Kăn pơkuâ hdroâng kuăn ngo kong pơlê Thái Nguyên tối ăm ‘nâi:

‘’Ƀă hiâm mơno khŏm mơ-eăm dêi khu râ kăn pơkuâ hnê ngăn cheăng Đảng kong pơlê, troh hơnăm 2025, ngin kô kơdroh tơdế kơxô̆ cheăm ki pá puât păng ‘nâng, mơ-eăm troh hơnăm 2030, Thái Nguyên kô ôh tá ai xếo tơring, cheăm ki pá puât păng ‘nâng’’.

Pơkâ xiâm ôh tá ai tơring, cheăm ki pá puât păng ‘nâng cho môi hnoăng cheăng ki xiâm tung troăng hơlâ pơkuâ ngăn hdroâng mơngế, xuân môi tiah tung tơdroăng pêi pro Pơkâ hneăng hôp Đảng ƀô̆ kong pơlê Thái Nguyên dêi hneăng cheăng nếo. Kơxô̆ thôn, cheăm lo ing kơpong ki pá puât păng ‘nâng tung kong pơlê Thái Nguyên kơdroh hên ôh tá xê hdró tung cheăng kâ – rêh ối pơlê pơla mê ối cho xiâm kối vâ mơjiâng ƀă pêi pro mâu tơdroăng troăng hơlâ hdroâng mơngế tung hneăng pơtối. Pôa Đỗ Danh Huân, Kăn phŏ hnê ngăn Vi ƀan tơring Đông Hỷ, Thái Nguyên tối ăm ‘nâi ‘na troăng pêi dêi tơring.

“Ngin tơkŭm mơdêk, hnê mơhno ăm tơdroăng ki hlê plĕng dêi vâi krâ kuăn pơlê, ‘na tơdroăng xăm kơklêa kơdroh kơtiê, mơdêk kơlo rêh ối dêi kuăn pơlê, pêi pro tơdrêng tơtro mâu kơxô̆ liăn ƀă pro chiâng tơdroăng ki tơdjuôm vâ pêi pro xăm kơklêa kơdroh kơtiê’’.

Ngăn tiô tơbleăng dêi mâu kong pơlê ‘na mơnhên kơpong vâi krâ hdroâng kuăn ngo ƀă kong ngo tiô pơkâ a Pơkâ kơxô̆ 33/2020/QĐ-TTg dêi Ngế pro xiâm hnê ngăn Chin phuh, Vi ƀan hdroâng mơngế hiăng rah chêh inâi mâu thôn ki pá puât vâ tơbleăng pơkâ kĭ ăm pêi pro xiâm kối inhên, xúa, tơkŭm po pêi pro mâu troăng hơlâ ai tơdjâk tung hneăng hơnăm 2021 – 2025.

Nếo achê pơla kố, hâi lơ 16/9/2021, Ngế xiâm, Kăn pơkuâ Vi ƀan Hdroâng mơngế hiăng kĭ Pơkâ kơxô̆ 612/QĐ-UBDT kĭ inâi 13.222 thôn ki pá puât, mê cho: 11.179 thôn dêi cheăm kơpong III; 736 thôn dêi cheăm kơpong II; 1.184 thôn dêi cheăm kơpong I ƀă 123 thôn dêi mâu cheăm ai thôn ối tung kơpong vâi krâ hdroâng kuăn ngo ƀă kong ngo tung tơring 41 kong pơlê, pơlê kong kơdrâm ối tung Tơnêi têa. Tung tơdroăng tơkŭm po pêi pro, tâng ai klâ, tơ’mot môi, tah lôi lơ pơ’lêh, Vi ƀan kong pơlê hnê mơhno mâu khu, kơvâ cheăng séa ngăn, mơnhên tiô pơkâ ƀă pro hô sơ tiô pơkâ a Pơkâ kơxô̆ 33/2020/QĐ-TTg hâi lơ 12/11/2020 dêi Ngế pro xiâm hnê ngăn Chin phuh pơtroh Vi ƀan hdroâng mơngế rah chêh, mơnhên ƀă pơkâ pơ’lêh, tơ’nôm. Pơkâ kố ai xêt khât sap hâi kĭ tơbleăng pêi pro ƀă pơ’lêh pơkâ kơxô̆ 433 hâi lơ 18/6/2021 dêi Ngế xiâm, Kăn pơkuâ Vi ƀan hdroâng mơngế ‘na kĭ inâi mâu thôn ki pá puât kơpong vâi krâ hdroâng kuăn ngo ƀă kong ngo hneăng hơnăm 2021 – 2025.

VOV4 chêh

A Sa Ly tơplôu ƀă tơbleăng