VOV4.Sêdang - Hâi lơ 7/4, pôa Nguyễn Phú Trọng, Kăn xiâm pơkuâ hnê ngăn Đảng, Khu hnê ngăn Đảng hiăng hôp vâ seá ngăn, pơkâ mơ’no pôa Tất Thành Cang prế pôa Lê Văn Phước lo ing Đảng. Tung pơla tơdah pêi hnoăng cheăng tung Tíu xiâm Đảng Tơnêi têa, Kăn phŏ hnê ngăn Đảng pơlê kong kân Hồ Chí Minh, pôa Tất Thành Cang hiăng pro xôi kân luât pơkâ tơkŭm môi tuăn dêi kuăn pơlê, Luât pơkâ pêi cheăng ƀă mâu Luât pơkâ dêi Đảng, Luât dêi tơnêi têa, pro lŭp hên liăn ngân dêi tơnêi têa, hiăng tro Kơ koan kăn sát séa ngăn, Kŏng an Pơlê kong kân Hồ Chí Minh kơ-êng mơnhên, tơbleăng pơkâ tơleăng mơngế ki ai xôi ƀă rup kroăng xua “pro xôi luât pơkâ ‘na rak ngăn, xúa tơmeăm khoăng tơnêi têa, pro lŭp hên liăn ngân, mơ’nhiê kế tơmeăm’’.

Pôa Lê Văn Phước, pêi hnoăng cheăng cho tung khu kăn pơkuâ hnê ngăn Đảng kong pơlê Phú Yên, Kăn pơkuâ hnê ngăn Đảng, Ngế xiâm dêi hngêi Tơleăng kong pơlê Phú Yên hiăng pro xôi luât pơkâ dêi Đảng ‘na tơdroăng ki đảng viên ôh tá chiâng pro, pôa hiăng pro xôi luât pơkâ ‘na liăn ngân, ƀă kâ kơhveăm, kâ kơluâ tơmeăm khoăng  liăn ngân tơnêi têa, kuăn pơlê, hiăng tro hngêi tơleăng râ xiâm a Đà Nẵng pơkâ pơxâu phâk 12 hơnăm 6 khế xua ai xôi tong kâ hơrế liăn ngân tơmeăm khoăng”.  

Tơdroăng xôi dêi pôa Tất Thành Cang prế pôa Lê Văn Phước cho kân ‘nâng, chiâng pro ‘mêi tung kuăn pơlê, pro chiâng tô tuăn hêng hôu tung khu kăn ƀô̆ đảng viên ƀă kuăn pơlê, pro ‘mêi troh tơdroăng loi nhoăm dêi mâu khu tơrŭm cheăng Đảng. Khu kăn hnê ngăn Đảng pơkâ mơ’no tah lo ing Đảng ƀă pôa Tất Thành Cang prế pôa Lê Văn Phước.

Gương tơplôu ƀă tơbleăng