VOV4.Sêdang - Tơdroăng hnê tối mơdêk hlê plĕng ‘na hbrâ mơdât pơreăng COVID-19 a kơpong thôn pơlê cho pơxúa ƀă kal khât, malối tung pơla dế ai hên ngế ing kơpong tâ pơreăng vêh. Nâ Nguyễn Thị Phương, kuăn ngo Tày, ối a cheăm Čư̆ Mgar, tơring Čư̆ Mgar, kong pơlê Dak Lak ƀă tơdroăng hnê tối ki tro dêi tơná tung hriăn chêh nếo mâu tơdroăng tiô tơdrá Then pơxá ‘na hbrâ mơdât pơreăng COVID veăng hnê ăm rêm ngế kuăn pơlê rơtế hlê, rơtế tơveăng hbrâ, tơplâ, mơdât pơreăng COVID-19.

Tơdroăng hơdruê ro tơniâ, tơ’lêi hlê, tung mê ai hên tơdroăng hnê tối ki pơxúa hiăng châ nâ hơdruê ƀă rơkong hmâng hơniâp ro tiô tơdrá Then hnối rêi prôa tĭnh hmâng chiâng tơngôu, rơrêk tung hiâm mơno. Mâu video dêi nâ Phương hiăng châ tơbleăng tung tung Facebook, Youtube hiăng ai hên kuăn pơlê hmâng.

Kố cho mâu rơkong hơdruê xua nâ Nguyễn Thị Phương, hdroâng kuăn ngo Tày, a thôn 5, cheăm Čư̆ Mgar, tơring Čư̆ Mgar, kong pơlê Dak Lak chêh xêh chư tiô tơdrá then dêi hdroâng kuăn ngo Tày – Nùng ƀă hnối hơdruê. Tung chư dêi ƀai hơdruê xua nâ Phương chêh: ‘’Hbrâ mơdât pơreăng môi tiah tơtrâ xâ, pin rơtế dêi rơpó môi hiâm mơno tơdjuôm ivá hbrâ mơdât pơreăng COVID-19 ƀă hên ki ê. Rêm ngế, bô bố xuân cho lêng, pin rơtế dêi rơpó khŏm mơ-eăm tơkâ luâ’’.

Ƀă rơkong ki tro ‘ló, ro tơniâ nâ hiăng pơtroh môi tơdroăng ki hơdruê ƀă tŭm hiâm mơno hnê mơhno “hbrâ mơdât pơreăng môi tiah tơtrâ xâ’’ dêi Ngế pro xiâm hnê ngăn Chin phuh, tơdroăng pơkâ ‘’5K’’ dêi Khu xiâm ngăn pơkeăng ƀă khăm pơlât tung hbrâ mơdât pơreăng. Tơdrêng amê veăng hơlêm tơdroăng ki tơbrê tơbrêh, tơdroăng ki pleăng ivá hlâ rêh dêi mâu ƀok thái pơkeăng, khu kŏng an, khu lêng ƀă hên mâu ngế ki ê tung hbrâ mơdât pơreăng.

Nâ Nguyễn Thị Phương hơdruê tung măng pơlê pơla

Ing mê, mơhnhôk thế rêm ngế pêi pro i kơhnâ khât mâu tơdroăng pơkâ hbrâ mơdât pơreăng, ai hiâm mơno pôi tá xâu rơ-iêo, loi tơngah kô kâi hbrâ mơdât pơreăng ƀă rĕng châ vêh ƀă tơdroăng rêh ối tiah hmâ tơniăn lĕm.

Bu klêi kơ’nâi to lâi hâi mơ’no tung Facebook ƀă Youtube, ƀai hơdruê hiăng ai lối hrĭng rơpâu ngế ngăn, lối hrĭng ngế veăng chêh tơpui ƀă xing xoăng mâu ngế ki ê rơtế ‘nâi hlo ƀă hmâng. Ngoh Nguyễn Trung Hải, hdroâng kuăn ngo Tày a pơlê kân Quảng Phú, tơring Čư̆ Mgar ngăn video ki châ xing xoăng tung Facebook ăm ‘nâi:

“Klêi kơ’nâi ngăn video nâ Phương hơdruê á hlo gá ro khât, sap ing chư hơdruê, nâl hơdruê, tơdrá then. Ƀai hơdruê hiăng mơhnhôk hiâm mơno vâi krâ nhŏng o mâu hdroâng kuăn ngo môi hiâm mơno hbrâ mơdât pơreăng, ƀă tung tơdroăng môi tiah dế nôkố gá tro khât. Tơdroăng ki xúa idrâp hơdruê vâ hnê tối vâi krâ nhŏng o châ hmâng hnê tối ƀă mâu ƀai hơdruê, ƀă idrâp then dêi hdroâng kuăn ngo tơná kum ăm kuăn pơlê tơ’lêi hlê. Tơná á ƀă mâu ngế ki lâi hiăng hmâng ƀai hơdruê xua nâ Phương hơdruê mê pơrá hâk vâ ƀă hlê plĕng tâ tung hbrâ mơdât pơreăng’’.

Nâ Nguyễn Thị Phương tung ếo pơtâk dêi hdroâng kuăn ngo drêng hơdruê then

Nâ Nguyễn Thị Phương tối, tung mâu hâi hdrối kố nah, nâ ƀă mâu ngế ki ê tung tôh hbrâ mơdât pơreăng dêi thôn, cheăm dế kơhnâ khât tung hnê tối ‘na hbrâ mơdât pơreăng ăm vâi krâ nhŏng o, xuân môi tiah hnoăng cheăng tŏng kum pế pơchên hmê kơchâi a kơpong ki klâ ối krê tíu ki ăm mâu ngế pêi cheăng vêh sap ing mâu kong pơlê ki ai pơreăng.

Tung pơla chôu pơtê, nâ Phương hiăng po măng tăng mâu ƀai hơdruê ki tối ‘na hbrâ mơdât pơreăng COVID-19 vâ pơ’lêh chiâng tơdrá hơdruê then klêi mê hơdruê ƀă xup video mơ’no tung măng pơlê pơla. Tiô nâ Phương, hơdruê then, rêi prôa tĭnh cho tơdroăng hơdruê ki hơniâp ro ôh pá chiâng lôi dêi hdroâng kuăn ngo Tày – Nùng. Thôn nâ ối ƀă mâu thôn ki achê ai chía hên mâu ngế Tày – Nùng rêh ối mê túa ki hnê tối kố kô kum kuăn pơlê tơ’lêi hlê ƀă tơ’lêi chôu pâ tâ.

“Hlo tơdroăng ki tơmâng dêi rêm ngế ƀă túa pêi pro kố dêi tơná mê á hlo phiu ro khât. Maluâ nôkố á thế tơvâ ƀă tơdroăng tŏng kum hbrâ mơdât pơreăng a cheăm, la ngiâ kố ah xuân kô mơ-eăm kum chôu vâ tăng tơ’nôm mâu tơdrá hdruê then ki nếo ƀă rơkong hơdruê tơtro vâ pơtối hơdruê mâu ƀai hơdruê tiô tơdrá then vâ hnê tối ăm kuăn pơlê’’.

Nâ Nguyễn Thị Phương mơhnhôk thế veăng tơlo ăm khu râng liăn hbrâ mơdât pơreăng COVID-19

Jâ Hồ Thị Thanh Hải, Kăn hnê ngăn Vi ƀan Măt trâ̆n Tơnêi têa Việt Nam cheăm Čư̆ Mgar ăm ‘nâi, mơngế hdroâng kuăn ngo Tày – Nùng akố châ lối 16% tung lâp cheăm. Ki hên kuăn pơlê tung pơla hơnăm dế pêi cheăng a cheăm nôkố dế lăm pro kŏng nhân a mâu kong pơlê Bình Dương, Đồng Nai ƀă Pơlê kong kân Hồ Chí Minh. Mâu hâi hdrối kố nah, drêng mâu kong pơlê kố ăm thế klâ krê pơlê pơla tiô pơkâ kơxô̆ 16, hên ngế pêi cheăng hiăng vêh dêi a cheăm vâ ví pơreăng. Xua mê, rơtế ƀă hnoăng cheăng mơhnhôk tŏng kum ƀă tơdah xo mâu kế tơmeăm tŏng kum ăm hnoăng cheăng hbrâ mơdât pơreăng, mê tơdroăng ki hnê tối mơdêk ki hlê plĕng ƀă tơdroăng ki tơrŭm dêi kuăn pơlê cho kal khât.

Cho ngế ki pơkuâ hnoăng cheăng Măt trâ̆n hnối cho Chi hô̆i trưởng vâi kơdrâi, nâ Nguyễn Thị Phương hiăng ai hên tơdroăng cheăng pêi pro veăng rơtế ƀă mâu khu lêng ki hbrâ mơdât pơreăng. Tung mê, xúa tơdrá then vâ hnê tối cho túa pêi pro ki nếo, tơtro ƀă tơdroăng ki rơhêng vâ hmâng ƀai hơdruê dêi hên kuăn pơlê a cheăm.

“Nâ Phương cho môi tung mâu kăn ƀô̆ ki kơhnâ, hâk vâ veăng tung mâu tơdroăng pơkâ dêi cheăm. Nâ đi đo châ râ kơpêng loi tơngah ƀă kuăn pơlê hâk mơnâ. Tung pơla hdrối kố nah nâ hiăng xúa tơdrá hơdruê then dêi hdroâng kuăn ngo tơná vâ hnê tối ăm kuăn pơlê tung hbrâ mơdât pơreăng. Kố cho túa pêi pro ki nếo, tơ-ƀrê ƀă cheăm Čư̆ Mgar tối krê ƀă tơring Čư̆ Mgar tối tơdjuôm’’.

Hơdruê then, rêi prôa tĭnh cho tơdrá hơdruê ki oh tá păng lôi dêi hên ngế Tày – Nùng a mâu kong pơlê. Mơdêk ki tro ‘ló, ki lĕm sap ing tơdrá hơdruê ƀă then khôi hmâ dêi hdroâng kuăn ngo, nâ Nguyễn Thị Phương hiăng chêh nâl hơdruê tơtro vâ hnê tối ‘na hnoăng cheăng hbrâ mơdât pơreăng môi tơtiah tơtrâ xâ, xuân môi tiah tơdroăng ki pá puât dêi mâu ngế ki hbrâ mơdât pơreăng, sap ing mê, krếo thế mơdêk ki hlê plĕng ăm kuăn pơlê vâ rơtế tơdjuôm ivá hbrâ mơdât pơreăng COVID-19.

H’Xíu H’Mok chêh

Katarina Nga tơplôu ƀă tơbleăng