VOV4.Sedang - Hâi lơ 6/5, a tíu pêi cheăng Chin phuh, pôa Phạm Minh Chính, Ngế pro xiâm hnê ngăn Chin phuh pêi cheăng ƀă Khu xiâm pơkuâ hnê hriâm ƀă Hnê mơjiâng tuăn ngôa rơkê ‘na mâu tơdroăng ối tơvâ tơvân, thâ kal tơleăng, mâu pơkâ, pâ thế dêi kơvâ. Ngế pro xiâm hnê ngăn tơnêi têa vêh tối mâu pơkâ thâ nôkố tung hbrâ mơdât COVID 19, ôh tá tơngôu, tơdrêng amê thế tơniăn, kơchăng, ôh tá tô tuăn.

Pôa Phạm Minh Chính, Ngế pro xiâm hnê ngăn Chin phuh xông tơpui mơgêi a hneăng hôp

Kơvâ hnê hriâm kal tơrŭm ƀă mâu tíu cheăng ki tơdjâk pêi pro kơtăng, châ tơƀrê tơdroăng hbrâ mơdât pơreăng, rak tơniăn ivá ăm hok tro, sinh viên, thái cô, tơdrêng amê ai troăng pêi vâ pêi kêi đeăng hnoăng cheăng hriâm cheăng, tơkŭm po châ tơƀrê tơ’noăng râ má pái phôh thong tơnêi têa la ngiâ.

Mơgêi a roh pêi cheăng, pôa Phạm Minh Chính mơnhên, kuăn mơngế cho kal má môi, cho vâ pơkâ tơdroăng mơjiâng ƀă mơnhông mơdêk tơnêi têa, ai kuăn mơngế pêi cheăng pa kĭng khôi túa tơdroăng mơnhông mơdêk hdroâng mơngế, ai hnoăng kal khât tung tơdroăng hnê hriâm.

A Sa Ly tơplôu ƀă tơbleăng