VOV4.Sêdang - Ngế pro xiâm hnê ngăn Chin phuh nếo tơbleăng Pơkâ kơxô̆ 13/CT-TTg ‘na thăm pêi pro rĕng ƀă mơdêk ki hôm tung mơjiâng pơkâ mơ’no liăn cheăng tơnêi têa iâ khế hneăng hơnăm 2021 – 2025. Ngế pro xiâm hnê ngăn Chin phuh pơkâ mâu Ngế xiâm, Kăn pơkuâ mâu kơ koan râ xiâm, kơ koan ối tung Chin phuh, mâu kơ koan ki ê a râ xiâm tơnêi têa, mâu khu cheăng kal kí – rêh ối pơlê pơla; pơkâ mâu Kăn pơkuâ hnê ngăn cheăng Đảng kong pơlê, pơlê kong kơdrâm ƀă pơkâ mâu kăn hnê ngăn Vi ƀan kuăn pơlê mâu kong pơlê, pơlê kong kơdrâm ối tung tơnêi têa tơkŭm hnê mơhno pêi pro tơdâng tơ’mô, kơtăng mâu tơdroăng xiâm kơ’nâi: Pêi tiô pơkâ ƀă inhên mâu troăng tơmiât pêi, pơkâ pêi, hnoăng cheăng, troăng pêi, 3 troăng pêi ki hôm tối a Troăng pêi ton xŏn mơnhông cheăng kâ – rêh ối pơlê pơla 10 hơnăm 2021 – 2030, troăng mơnhông cheăng kâ – rêh ối pơlê pơla 5 hơnăm 2021 – 2025 hiăng châ Hneăng hôp roh má XIII dêi Đảng tơbleăng ăm pêi pro.

Mơ’no liăn ai xiâm kối nhên tung mâu kơvâ ki xiâm, mâu tơdroăng tơkêa bro kân, ki kal dêi tơnêi têa, tơdroăng tơkeâ bro kân, tơrŭm ƀă kơpong, mâu tơdroăng tơkêa bro ki kal, thâ rĕng dêi kong pơlê vâ mơdêk châ tơƀrê xúa kơxô̆ liăn mơ’no pêi cheăng.

A Sa Ly tơplôu ƀă tơbleăng