VOV4.Sêdang - Hlo mâu tơdroăng ki rế hía rế ôh tá tơniăn dêi pơreăng kân COVID-19, rế hlo ai tơdroăng ki ‘mêi ƀă tơpá vâ ‘nâi hdrối, pôa Phạm Minh Chính, Ngế pro xiâm hnê ngăn Chin phuh hiăng ai hlá mơ-éa pơtroh hnê mơhno pơtối mơdêk khât ki tơƀrê dêi hnoăng cheăng hbrâ mơdât pơreăng COVID-19.

Hlá mơ-éa mê tối nhên: Mâu tơdroăng ki ôh tá hbrâ kơchăng, ôh tá vâ hmâng, ôh tá pôu râng dêi hnoăng cheăng, pêi pro ôh tá kơtăng mâu tơdroăng pơkâ, hnê mơhno ‘na hbrâ mơdât pơreăng athế châ mơnhên hnoăng cheăng khu pú hên ƀă mâu ngế krê ƀă pơkâ tơleăng kơtăng tro tiô pơkâ dêi Đảng ƀă luât dêi Tơnêi têa.

Ngế pro xiâm hnê ngăn tơnêi têa pơkâ thế mâu khu xiâm, kơvâ cheăng, mâu kong pơlê hbrâ mơdât, ‘mot tơ’nôm, pêi klêi mâu tơdroăng pơkâ nôkố ‘na hbrâ mơdât pơreăng COVID-19 tiô tơdroăng ki xing xoăng râ, xing xoăng hnoăng rế pêi pro tơdroăng ki séa ngăn hbrâ mơdât hnoăng cheăng ăm rêm râ, mâu kơvâ cheăng, kong pơlê hbrâ rơnáu, rơkê plĕng tung hbrâ mơdât pơreăng châ tơƀrê. Tơdrêng amê hnối pôu râng dêi hnoăng cheăng ƀă hnoăng cheăng hbrâ mơdât pơreăng ƀă mơnhông cheăng kâ rêh ối pơlê pơla tung tơdroăng nôkố.

Katarina Nga tơplôu ƀă tơbleăng