VOV4.Sêdang - Hneăng hôp Khu tơrŭm cheăng xua vâ mơdêk tơniăn lĕm ƀă pơkâ tung lâp plâi tơnêi (P4G) 2030 po a hâi lơ 30-31/5/2021 tiô tơdroăng hrik tiô troăng internet mơ’no tơdrêng tung um tơvi, tơdroăng kố ai pôa Moon Jae -in, Kăn xiâm pơkuâ kong têa Hàn Quốc pơkuâ. Pôa Phạm Minh Chính, Ngế pro xiâm hnê ngăn tơnêi têa veăng Hôp tơpui to khu râ kăn ƀă tơdroăng cho ngế tung khu hriăn mơjiâng P4G.

Tơdroăng cheăng pêi ki kal má môi dêi Khu cho hneăng hôp tơpui to khu kăn xiâm po a hâi lơ 31/5/2021 (tiô chôu Việt Nam), veăng hôp tơdrêng mê, ai Kăn xiâm dêi mâu kong têa Hàn Quốc, Đan Mạch, Colombia, Kăn xiâm hnê ngăn Vi ƀan châu Âu, Việt Nam, Hà Lan, Kenya, Costa Rica, Peru, Áo, Siam, Kul, Ngế kum pêi hnoăng cheăng pơkuâ ‘na hyôh kong prâi dêi Mih ƀă Ngế xiâm pơkuâ rak Liăn ‘măn kơdĭng lâp plâi (IMF).

A hneăng hôp, mâu kăn xiâm hiăng tơpui tơno pái tơdroăng ki kal tung pơla kố. Mê cho tơkŭm tơpui pái tơdroăng: ‘mâi mơnhông ngiât lĕm drêng ai pơreăng COVID-19, ki kơdo mơ-eăm dêi kuăn pơlê tung lâp plâi tơnêi troh pơkâ pro krúa ing hyôh carbon troh hơnăm 2050 ƀă mơdêk pêi pro xua vâ rak krúa hyôh kong prâi ƀă pro tơ’lêi hlâu ăm tơdroăng tơrŭm cheăng tơnêi têa-tơrŭm tơdroăng cheăng kâ.

Tơpui a hneăng hôp mâu kăn xiâm, pôa Phạm Minh Chính tối nhên, pơreăng kân ƀă mâu tơdroăng xơpá, pơloăng mơnúa xuân vâ pro ăm mâu kong têa hlo nhên ki kal dêi tơdroăng kring vế ‘na rêh ối. Ngế pro xiâm hnê ngăn tơnêi têa pâ thế la lâi kuăn pơlê tung lâp plâi tơnêi kal thế môi tuăn ‘no ivá veăng tơleăng rak tơniăn pơla tơdroăng vâ pro tơdrêng ‘mâi mơnhông cheăng kâ ƀă thế mơnhông mơdêk ngiât lĕ ƀă mơnhông krá tơniăn tâ drêng rôh ai COVID-19.

Gương tơplôu ƀă tơbleăng