VOV4.Sêdang - Kơxê lơ 10/5, pôa Phạm Minh Chính, Ngế pro xiâm hnê ngăn Chin phuh pơkuâ po rôh hôp pơla Khu pơkuâ Chin phuh ƀă Khu hnê mơhno cheăng Tơnêi têa hbrâ mơdât pơreăng COVID-19 vâ tơpui ‘na mâu troăng hơlâ ‘mâi mơnhông tơdrêng hlối mâu tơdroăng ki tá hâi pêi pro kơtăng tung tơdroăng ki pơkâ mơ’no mâu troăng hơlâ ó rơdêi tâ tung hnoăng cheăng hbrâ mơdât pơreăng COVID-19.

Pôa Phạm Minh Chính, Ngế pro xiâm hnê ngăn Chin phuh

Mâu rơkong tơpui tối a rôh hôp pơrá tối nhên ‘na mâu tơdroăng ki pin xuân ối hbrâ mơdât tơdroăng, maluâ rôh tâ tú dêi pơreăng rôh kố rĕng tâ, rơdâ tâ, ôh tá tơniăn tâ, tơpá vâ hbrâ mơdât, tơdjâk hên tâ. La tâng pin ôh tá pơtối ai mâu troăng hơlâ pêi pro tơdrêng, kơhnâ, rơdêi, tâng xuân ối ai tơdroăng ki ôh tá vâ hmâng, ôh tá hbrâ kơchăng lơ tơkôm, mê pin kô athế trâm tơdroăng ki ôh tá ‘nâi hdrối, kô xơpá tâ.

Xua mê, Ngế pro xiâm hnê ngăn tơnêi têa vêh pơchân nếo kal mơdêk tơdroăng ki tơƀrê ƀă ki rơkê plĕng tung hbrâ mơdât 3 rôh pơreăng hdrối nah, pôi tá préa, hlê plĕng, séa ngăn tơdroăng pêi pro ki ai khât, hbrâ rơnáu, kơhnâ pêi pro châ tơƀrê mâu troăng hơlâ ki tơtro, tiô tơdroăng ki hnê mơhno dêi Khu pơkuâ ngăn Đảng, Chin phuh, Ngế pro xiâm hnê ngăn Chin phuh ƀă kăn pơkuâ Khu hnê mơhno cheăng Tơnêi têa.

Katarina Nga tơplôu ƀă tơbleăng