VOV4.Sêdang - Hâi lơ 18/5, pôa Phạm Minh Chính, Ngế pro xiâm hnê ngăn tơnêi têa pêi cheăng ƀă Khu xiâm ngăn ‘na mơjiâng tơmeăm khoăng ‘na tơdroăng pêi pro tiô pơcháu dêi kơvâ cheăng, mâu tơdroăng cheăng pêi ki hâi klêi, mâu tơdroăng cheăng ki pơxúa, ton ta ah, mâu tơdroăng pơkâ, pâ thế dêi mâu kơvâ cheăng. Pêi cheăng ƀă Khu xiâm ngăn ‘na mơjiâng tơmeăm khoăng, pôa Phạm Minh Chính tối hên tơdroăng pơkâ pêi vâ mơnhông kơvâ cheăng tung la ngiâ, mê cho mơnhông ‘na mơjiâng hngêi trăng thế rơtế ƀă tơdroăng rơkê ‘na pơlê pơla; mơnhông mơdêk kơphô̆ chiâng môi kơvâ cheăng kâ ki kal; nhoăm ƀă ‘no liăn mơjiâng pro tro tiô tơdroăng pơkâ; mơjiâng luât tơ’mot mâu ngế pêi cheăng.

Ngế pro xiâm hnê ngăn tơnêi têa tối nhên, tơ’mot châ 1 liăn vâ pêi cheăng dêi mơngế krê xuân hiăng kơnía khât. Tơbleăng dêi Ngế pro xiâm hnê ngăn tơnêi têa, pôa Nguyễn Thanh Nghị, Ngế xiâm ngăn ‘na mơjiâng tơmeăm khoăng tối nhên mâu tơdroăng châ pêi pro tung mâu tơdroăng cheăng râk ngăn. Tung hneăng hơnăm 2016-2020, Khu xiâm hiăng hbrâ séa ngăn, tah lôi mâu tơdroăng pơkâ ki tơvâ tơvân, ki ôh tá tro tung mâu hlá mơ-eá chêh pơkâ dêi luât, mơdêk tơdroăng ‘mâi pro hlá mơ-éa.

Khu xiâm tơkŭm pêi tơdroăng mơnhông ‘na hngêi ối a râ tơnêi têa, troh hơnăm 2020, lâp tơnêi têa hiăng ƀă dế tơbleăng pêi 5.000 tơdroăng tơkea pro hngêi ối, kơphô̆ ki nếo (tâk luâ tâ 3 hdroh tâng vâ pơchông ƀă hơnăm 2010). Tơdroăng tê mơdró tơnêi hngêi trăng hâi hlo ai tơdroăng ki phá tơ ê, ki oh tá tro.

Gương tơplôu ƀă tơbleăng