VOV4.Sêdang - Kơxê lơ 15/3, a tíu pêi cheăng Chin phuh, pôa Nguyễn Xuân Phúc, Ngế pro xiâm hnê ngăn tơnêi têa pơkuâ hneăng hôp tiah hmâ dêi Chin phuh tơpui tơno ‘na hlá mơ-eá chêh pơkâ dêi Vi ƀan pơkuâ cheăng Kuô̆k hô̆i pơkâ kơxô̆ liăn xúa troăng kân tơdrăng lĕm ing tíu xo liăn a drô troăng kân tơdrăng lĕm xua Tơnêi têa ‘no liăn mơjiâng pro. 

Tiô tối tơdroăng xo liăn ăm xua prôk a troăng kân tơdrăng lĕm ƀă mâu tơdroăng tơkêa xua Tơnêi têa ‘no liăn pro cho kal khât vâ tơvêh chĕn liăn mung, pơtối ‘mâi rơnêu, rak vế... La Ngế pro xiâm hnê ngăn tơnêi têa tối, Tơnêi têa ‘no liăn pro troăng kân tơdrăng lĕm ôh tá xê vâ mơdró xo liăn ăm pơxúa tê mê tơdroăng xo liăn ki mê vâ rak tơniăn a kơxô̆ liăn chêl a mâu kơxô̆ liăn ki kal vâ tơvêh chĕn liăn mung, ‘mâi rơnêu, pro, rak ngăn...

Ing tơdroăng kơ-êng mâu khu xiâm, kơvâ cheăng, tiô Ngế pro xiâm hnê ngăn tơnêi têa, pơla nôkố tối mâu tơdroăng ki nhên, tơdroăng rơhí rơhó tơdjâk troh kuăn pơlê ƀă tơdroăng cheăng kâ mê kal thế hbrâ rơnáu nhên. Hlá mơ-eá Luât ‘na troăng prôk ki ‘mâi rơnêu dế tung pơla chêh hiăng vâ klêi, mê kal thế chêh ‘mot tơdroăng kal mê tung hlá mơ-eá luât.

Gương tơplôu ƀă tơbleăng