VOV4.Sêdang - Pơkuâ ƀă xông tơpui a hneăng hôp mơ’no tơdrêng tung um tơvi ƀă Khu hnê mơhno tơnêi têa ƀă 63 kong pơlê, pơlê kong kơdrâm ‘na hbrâ mơdât COVID 19 tơkŭm po kơxê lơ 7/5 a Tíu pêi cheăng Chin phuh, pôa Phạm Minh Chính, Ngế pro xiâm hnê ngăn tơnêi têa tối rơdêi, ôh tá ăm ai tơdroăng môi ngế tơngôu tung tơdroăng hbrâ mơdât pơreăng pro lâp pơlê pơla xâu xía. Klêi kơ’nâi ti tăng ngế ki tâ pơreăng ƀă xiâm kối pơreăng xông tâ tú, Khu hnê mơhno tơnêi têa mơnhên pơreăng Hà Nam tơdjâk troh ngế tro tâ pơreăng má 2899, pơreăng ing Yên Bái, Vĩnh Phúc tơdjâk troh khu ngế ki cheăng hriăn rơkê Ấn Độ ƀă Sinuâ, pơreăng a hngêi pơkeăng K xông tâ tú ing pơreăng Hngêi pơkeăng Nhiêt đơ̆i Tơnêi têa.

Laga pơreăng a Hngêi pơkeăng Nhiêt đơ̆i Tơnêi têa ƀă mâu ngế tro tâ pơreăng a Đà Nẵng, Hải Dương ôh tá ‘nâi nhên xiâm kối tâ tú. Tơdroăng ki mê ăm hlo, tung pơlê pơla hiăng ai pơreăng. Ing pơreăng a Hngêi pơkeăng K ƀă Hngêi pơkeăng Nhiêt đơ̆i Tơnêi têa, pôa Nguyễn Thanh Long, Ngế xiâm pơkuâ ngăn pơkeăng ƀă khăm pơlât mơnhên, mâu hngêi pơkeăng thế po rơdâ mơdât mâu kơpong tơ’lêi tro tâ pơreăng môi tiah kơbong khăm pơlât, pơlât apoăng, pơlât kơkốu. Hngêi pơkeăng ƀă mâu ƀok thái pơkeăng kal châ xo mơheăm vâ khăm ngăn, rĕng châ hlo mâu ngế dương tĭnh.

Xông tơpui a hneăng hôp, pôa Phạm Minh Chính pơkâ thế pôi tá tơngôu tung tơdroăng hbrâ mơdât pơreăng. Ngế pro xiâm hnê ngăn tơnêi têa xuân tối rơdêi, mâu kong pơlê drêng ai pơreăng, pôi tá tô tuăn; kal kơchăng, rơkê mơnhên tơdroăng vâ pêi pro mâu troăng hbrâ mơdât ki kal, ôh tá pro tơdjâk troh tơdroăng ki tơniăn pơlê pơla ƀă mơnhông mơdêk cheăng kâ.

A Sa Ly tơplôu ƀă tơbleăng