VOV4.Sêdang - Kơxo lơ 7/6, pôa Phạm Minh Chính, Ngế pro xiâm hnê ngăn Chin phuh pêi cheăng ƀă khu râ kăn pơkuâ mâu khu xiâm, kơvâ cheăng, mâu ngế cheăng khoa hok, kăn teăng mâ mâu kơ koan hriăn plĕng, mâu khu mơjiâng vaccine ‘na tơdroăng hriăn plĕng, mơjiâng vaccine hbrâ mơdât Covid 19. Teăng mâ Khu xiâm ngăn pơkeăng ƀă khăm pơlât hiăng tơbleăng Ngế pro xiâm hnê ngăn tơnêi têa ‘na mâu tơdroăng hriăn plĕng xúa khoa hok kơmăi kơmok dêi kơvâ khăm pơlât kum tung hbrâ mơdât Covid 19 tung pơla kố nah.

Ngế pro xiâm hnê ngăn tơnêi têa pêi cheăng ƀă mâu khu mơjiâng pro vaccine hbrâ mơdât Covid 19

Tung mê, hriăn plĕng mơjiâng kít tối tơdroăng tro tâ pơreăng, kít mơdât pơreăng djâ Việt Nam chiâng 1 tung 5 tơnêi têa mơjiâng pro kít kố. Troăng khăm ngăn RT-PCR apoăng châ tơƀrê lĕm, kô rĕng djâ xúa tung la ngiâ. Troh nôkố, lâp tơnêi têa ai 2 khu mơjiâng pro dế hriăn plĕng vaccine hbrâ mơdât Covid 19 cho vaccine Nanocovac dêi Kŏng ti tơlo liăn Kơmăi kơmok sinh hok pro pơkeăng Nanogen ƀă vaccine COVIVAC dêi Tíu pro vaccine ƀă sinh phẩm Nha Trang.

Xông tơpui a roh pêi cheăng, pôa Phạm Minh Chính tối, tơdroăng châ xúa vaccine hbrâ mơdât Covid 19 ôh tá tơ’lêi hlâu, ki má lối tung pơla pơreăng xông tâ tú hên tung lâp plâi tơnêi, ivá mơjiâng vaccine ôh tá hên. Ngế pro xiâm hnê ngăn tơnêi têa pơkâ mâu kăn teăng mâ tơpui tơno, tối hdrối tơdroăng ki chiâng pêi pro, mơngế pêi cheăng, pơkâ, hnoăng cheăng tung mơjiâng pro, rak ‘măn, tơkŭm po pâk vaccine ăm châ tơƀrê.

A Sa Ly tơplôu ƀă tơbleăng