VOV4.Sêdang - Kơxê lơ 17/5, a Ƀơrô cheăng Chin phuh, pôa Phạm Minh Chính, Ngế pro xiâm hnê ngăn Chin phuh hiăng pơkuâ po rôh hôp Chin phuh ‘na hnoăng cheăng hbrâ mơdât COVID-19; vâ mơ’no mâu tơdroăng pơkâ pêi pro tơdrêng ‘na tơdroăng ki roê xo, pro, tơkŭm pâk vaccine ƀă xing xoăng mơhnhôk mâu kơxô̆ liăn pêi pro. Nôkố tơdroăng pơreăng ôh tá tơniăn, ôh tá ‘nâi hdrối, malối cho a mâu tíu ki ai pơreăng a kong pơlê Bắc Giang ƀă Bắc Ninh, tíu ki tơkŭm hên kơpong cheăng ƀă kơmăi kơmok, hên kŏng nhân pêi cheăng ƀă hên ngế tro tâ tú.

Pôa Phạm Minh Chính tối nhên, ki xiâm xuân cho pêi pro tơdroăng pêi péa tơdroăng “rế hbrâ mơdât pơreăng, rế mơnhông cheăng kâ rêh ối pơlê pơla”, rak tơniăn ăm rôh tâ phĭu pôk kăn Kuô̆k hô̆i hneăng má 15 ƀă kăn Hô̆i đong hnê ngăn kuăn pơlê rêm râ hơnăm 2021 – 2026; mơgêi tơniăn lĕm hơnăm hriâm 2021; xo tơdroăng ki rak ngăn, rak vế ivá kuăn pơlê cho tơdroăng ki xiâm, ki pêi pro ahdrối.

Katarina Nga tơplôu ƀă tơbleăng