VOV4.Sêdang -  Hâi lơ 3/6, a tíu pêi cheăng Chin phuh, ing pơkuâ dêi pôa Phạm Minh Chính, Ngế pro xiâm hnê ngăn Chin phuh, mê Chin phuh hiăng hôp roh hôp tiah hmâ a khế 5/2021. A roh hôp, Chin phuh tơmâng tơbleăng ƀă tơpui tơno ‘na tơdroăng hbrâ mơdât COVID-19; mơnhên tơdroăng cheăng kâ – rêh ối pơlê pơla, liăn ngân Tơnêi têa khế 5 ƀă 5 khế hơnăm 2021; veăng tơbleăng tối tơdroăng cheăng kâ – rêh ối pơlê pơla, liăn ngân Tơnêi têa 6 khế apoăng hơnăm 2021 ƀă mâu troăng pêi tung 6 khế mơ’nui hơnăm 2021; mơnhên tơdroăng châ tơƀrê pêi pro Pơkâ mơ’no liăn cheăng iâ khế hneăng hơnăm 2016 – 2020 ƀă tối hdrối Pơkâ mơ’no liăn cheăng iâ khế hneăng hơnăm 2021 – 2025.

Pôa Phạm Minh Chính, Ngế pro xiâm hnê ngăn tơnêi têa a roh hôp

Xông tơpui pơxiâm po roh hôp, pôa Phạm Minh Chính mơnhên tối, roh hôp Chin phuh tiah hmâ khế 5 tơkŭm po tung pơla pơreăng COVID-19 xông tâ tú, pơreăng xông tâ tú rơdâ tâ, rĕng tâ, pơreăng virus rơ-iô tâ ƀă xông tâ tú tung mâu kơpong hngêi kơmăi kơmok, tơdroăng loi tĭng tiô khôp. Ngế pro xiâm hnê ngăn tơnêi têa pơkâ mâu kăn teăng mâ veăng Roh hôp tơkŭm tơpui tơno mâu tơdroăng tiô hiâm mơno: tơmiât khât, tối khât, pêi khât, châ tơƀrê khât; kuăn pơlê môi tuăn khât. Ing mê, mơnhên tro tơdroăng, pơkâ mâu troăng pêi pro châ tơƀrê mâu hnoăng cheăng tung la ngiâ.

A Sa Ly tơplôu ƀă tơbleăng