VOV4.Sêdang - Kơxo lơ 17/3, pôa Nguyễn Xuân Phúc, Ngế pro xiâm hnê ngăn tơnêi têa pơkuâ roh hôp mơ’no tơdrêng tung um tơvi pơla Khu râ kăn ai mâ đi đo tung Chin phuh ƀă Khu hnê mơhno tơnêi têa hbrâ mơdât pơreăng COVID 19 ƀă mâu troăng pêi kân vâ hbrâ mơdât pơreăng châ tơƀrê tung pơla kố nah, tơpui tơno mâu troăng pêi kân vâ hbrâ mơdât pơreăng tung la ngiâ. Xông tơpui a roh hôp, pôa Nguyễn Xuân Phúc tối nhên, pin hiăng mơdât châ tơƀrê mâu roh tâ tú tung pơlê pơla tung plâ 1 hơnăm, nhên khât cho 14 khế kố nah.

Tơdroăng mơdât COVID 19 dêi tơnêi têa pin hiăng châ lâp plâi tơnêi kheăn kơdeăn, châ kơdeăn tung hên hneăng hôp, rơ’jíu, um tơvi. Tung la ngiâ, tơdroăng mơdât pơreăng kơnôm hên tung tơdroăng mơjiâng pro pơkeăng vaccine. Laga, kơxô̆ pơkeăng vaccine rôe ing kong têa ê ối iâ  ƀă vaccine tung tơnêi têa pin tiô tối hdrối thế troh pái khế mơ’nui hơnăm 2021 Việt Nam nếo ai.

A ngiâ kal pơtối rak pêi pro mâu troăng hbrâ mơdât pơreăng tiô pơchân 5 thế, kố cho mâu troăng hbrâ mơdât pơreăng tơ’lêi hlâu, cheăng kâ ƀă châ tơƀrê tung hneăng nôkố.

A Sa Ly tơplôu ƀă tơbleăng