VOV4.Sêdang - Kơxo lơ 11/3, pôa Nguyễn Xuân Phúc, Ngế pro xiâm hnê ngăn tơnêi têa pơkuâ hneăng hôp tiah hmâ Chin phuh ‘na tơdroăng pơkâ xĭng xoăng tơdroăng pơkâ ‘no liăn cheăng pêi ton hơnăm ‘na liăn ngân tơnêi têa pơla hơnăm 2021-2025. Klêi tơmâng mâu kăn veăng hôp tối tơbleăng, tối mơgêi rôh hôp, Ngế pro xiâm hnê ngăn tơnêi têa tối nhên, pơkâ liăn ‘no pêi cheăng ton hơnăm pơla 2021-2025 ai hnoăng kal khât tung tơdroăng mơnhông tơnêi têa, mơnhông tŭm ‘na cheăng kâ, rêh ối pơlê pơla, ‘na lêng, ‘na kring gak tơniăn.

Pôa Nguyễn Xuân Phúc, Ngế pro xiâm hnê ngăn tơnêi têa

Ngế pro xiâm hnê ngăn tơnêi têa thế mâu khu xiâm, kơvâ cheăng, mâu kong pơlê  mơhnhôk tăng xiâm liăn ing tơdroăng ki ê vâ ‘no liăn mơnhông pro tơmeăm khoăng troăng klông ing mung liăn ODA, tơrŭm pơla tơnêi têa ƀă kuăn pơlê krê, liăn ngân dêi kong pơlê ƀă hía hé.

Ngế pro xiâm hnê ngăn tơnêi têa thế tơdroăng xĭng xoăng liăn cheăng ton hơnăm thế tơkŭm a tơdroăng mơjiâng tơmeăm khoăng ki kal, ki xiâm. Pakĭng mâu tơdroăng tơkêa bro mơnhông cheăng kâ mê xuân kal tơmâng mâu tơdroăng tơkêa bro ‘na mơhno túa lĕm tro rêh ối pơlê pơla, tung mê, ai mâu hngêi pơkeăng kân. Tung xĭng xoăng liăn ‘no mơjiâng pro tơmeăm khoăng kal thế ‘no tơdâng pơla mâu kơpong ăm tơtro.

Gương tơplôu ƀă tơbleăng