VOV4.Sedang -  Hâi lơ 9/5, pôa Phạm Minh Chính, Ngế pro xiâm hnê ngăn Chin phuh hiăng séa ngăn tơdroăng hbrâ mơdât pơreăng a mâu kong pơlê peăng mâ hâi lu pa Hdroh ƀă thế tơkŭm hôp mơ’no tơdrêng ing xiâm mơ’no tung um tơvi dêi Vi ƀan kong pơlê An Giang ƀă Khu hnê mơhno tơnêi têa ‘na hbrâ mơdât pơreăng COVID-19, mâu khu xiâm kơvâ cheăng ƀă mâu kăn 6 to kong pơlê ki tơkăng kong peăng mâ Hâi lu pa Hdroh.

Tung 10 hâi hdrối kố nah lâp tơnêi têa hiăng ai 275 ngế tâ COVID-19  tung kuăn pơlê. Ing mê, tiô séa ngăn ăm hlo hên kong pơlê xuân ôh tá vâ tơmâng, tơngôu, pro ôh tá xâu drêng hâi hlo ai pơreăng tâ tú a kong pơlê, la drêng hiăng ai pơreăng tâ tú vâi hlo kơdrâ, rĕng pêi pro tơdroăng hbrâ mơdât.

Tối mơgêi a hneăng hôp, pôa Phạm Minh Chính tối nhên, tâng pơreăng tâ tú tung lâp tơnêi têa kô tơdjâk troh pro tơniăn kal kí, ivá  dêi kuăn pơlê, hneăng tâ phĭu rah xo kăn Kuô̆k Hô̆i ƀă Hô̆i đong hnê ngăn kuăn pơlê rêm râ. Tơdroăng mơgêi hneăng hriâm hơnăm 2020-2021 kô ai tơdroăng ki ôh tá ‘nâi hdrối. Xua mê, mâu kong pơlê, kơ koan, tíu pêi cheăng pơtối hbrâ mơdât pơreăng, tơkâ luâ tơdroăng pá, rak tơniăn tơdroăng kal kí, tơniăn tung pơlê pơla ƀă tuăn tơmiât hnê mơhno “Rê̆ng tâ nếo; mơ-eăm pêi pro khât, kơhnâ tâ nếo, kơtăng tâ nếo; tơ-ƀrê tâ nếo; vâ kâi tơ-ƀrê tâ”.

Gương tơplôu ƀă tơbleăng