VOV4.Sêdang - Kơxo lơ 15/3, a tíu pêi cheăng Chin phuh, pôa Nguyễn Xuân Phúc, Ngế pro xiâm hnê ngăn tơnêi têa trâm mâ mâu kăn teăng mâ pơkuâ râng hnoăng liăn hriâm rơkê Vừ A Dính ƀă mâu kăn teăng mâ ăm mâu ngế ai hiâm mơno tŏng kum rơtế Khu râng hnoăng liăn hriâm rơkê tung hên hơnăm hiăng hluâ.

Troh nôkố, Khu pơkuâ râng hnoăng liăn hriâm rơkê hiăng diâp vâ chê 90 rơpâu hnoăng liăn hriâm rơkê tiah hmâ rêm hơnăm ăm hok tro sinh viên ối tung 54 hdroâng kuăn ngo nhŏng o, tung mê, ai tá hok tro Việt Nam rêh ối a kong têa Kul, Lếo, Siam, Cuba.

Ngế pro xiâm hnê ngăn tơnêi têa trâm mâ kăn teăng mâ Khu pơkuâ râng hnoăng liăn hriâm rơkê Vừ A Dính

Tung tơdroăng pêi cheăng dêi Khu pơkuâ râng hnoăng liăn hriâm rơkê 22 hơnăm hiăng hluâ, hơnăm 2014 mơnhên môi tơdroăng ki kal ƀă tơdroăng mơjiâng dêi Kâu lăk ƀô̆ “Xua Hoàng Sa-Trường Sa nhuô̆m pâ”, kum tơrŭm mâu ngế ai hiâm mơno tuăn pâ, hiâm mơno tơmiât troh kring vế hnoăng pơkuâ krih tơviah dêi Tơnêi têa.

Xông tơpui a roh trâm mâ, pôa Nguyễn Xuân Phúc, Ngế pro xiâm hnê ngăn tơnêi têa tối nhên, tơmâng troh rơxông ối nếo ƀă kring vế hnoăng pơkuâ tơnêi tíu pơrá cho mâu tơdroăng ki kal dêi Đảng, Tơnêi têa ƀă kuăn pơlê pin.

Tung la ngiâ, Ngế pro xiâm hnê ngăn tơnêi têa pói vâ Khu pơkuâ râng hnoăng liăn hriâm rơkê pêi cheăng châ tơƀrê, pôu râng hnoăng cheăng ƀă pơlê pơla, pơtối cho mâu tơkâng reăng lĕm kum hên tung kơdrum reăng lĕm dêi tơnêi têa.

            A Sa Ly tơplôu ƀă tơbleăng