VOV4.Sêdang - Tiô rơkong krếo thế dêi pôa Moon Jae-in, Kăn xiâm pơkuâ kong têa Hàn Quốc, hâi lơ 31/5, pôa Phạm Minh Chính, Ngế pro xiâm hnê ngăn tơnêi têa veăng Hneăng hôp kân Khu tơrŭm cheăng tơtêk ngiât lĕm ƀă Pơkâ pêi lâp plâi tơnêi hơnăm 2030 dó inâi P4G tiô troăng mơ’no tơdrêng tung um tơvi. Hneăng hôp châ mơnhên ai pơxúa kal khât tung pơlê hbrâ ví kong prâi hơ’lêh ƀă xông ngiât lĕm chiâng kơjo má môi dêi mâu kong têa.

Pôa Phạm Minh Chính, Ngế pro xiâm hnê ngăn tơnêi têa

Kố cho hneăng hôp kân Khu tơrŭm cheăng ngiât lĕm ƀă Pơkâ lâp plâi tơnêi roh má péa. Ƀă tơdroăng ki veăng dêi vâ chê 6 ngế kăn pơkuâ, khu râ kăn xiâm lo ing hên kong têa, Hneăng hôp hơnăm kố kô tơkŭm tơpui tơno mâu tơdroăng xiâm tơrŭm cheăng lâp plâi tơnêi xua pơkâ xông tơtêk ngiât lĕm klêi kơ’nâi ôh tá tơniăn xua pơreăng COVID 19.

Hneăng hôp kân Khu tơrŭm ‘na Tơtêk ngiât lĕm ƀă Pơkâ xiâm lâp plâi tơnêi cho troăng tơpui tơno tung mê mâu kong têa ối tung khu tơrŭm tŏng kum liăn ngân, ƀă mâu khu tơrŭm cheăng, khu tê mơdró ƀă xivil tơkŭm pêi pro mâu tơdroăng tơkêa bro. Pơkâ xiâm cho tŏng kum mâu kong têa dế mơnhông tơtêk ôh tá rơdêi tung tơdroăng hbrâ mơdât tơdroăng mơ’no hyôh pro tơdjâk hngêi nhĕng.

A Sa Ly tơplôu ƀă tơbleăng