VOV4.Sêdang - Tơdroăng mơhno Kơxô̆ liăn vaccine hbrâ mơdât COVID 19 kô châ tơkŭm po a kơmăng hâi tơdrốu, lơ 5/6/2021, a Hà Nội. Pôa Phạm Minh Chính, Ngế pro xiâm hnê ngăn tơnêi têa kô rơtế khu râ kăn pơkuâ Măt trâ̆n Tơnêi têa Việt Nam, mâu khu xiâm, kơvâ cheăng, mâu khu râ kal kí pơlê pơla, teăng mâ kuăn pơlê ƀă mâu khu tê mơdró kô veăng tơdroăng ki kal ƀă ai pơxúa kal phá tơ-ê kố.

Ngế pro xiâm hnê ngăn tơnêi têa veăng tơdroăng mơhno Kơxô̆ liăn rôe vaccine hbrâ mơdât COVID 19

Tơdroăng ki kal châ tơkŭm po vâ kơbông krếo kuăn pơlê, mâu lêng lâp tơnêi têa, kuăn pơlê pin ki rêh ối a kong têa ê, mâu khu tê mơdró, ngế tê mơdró, tâi tâng mâu khu tơrŭm, ngế krê tung tơnêi têa ƀă kong têa ê veăng tơlo liăn, tŏng kum ăm Khu râng liăn hbrâ mơdât COVID 19 ƀă hiâm mơno ƀă pôu râng hnoăng cheăng xua ivá rêm ngế, xua pơlê pơla, xua tơnêi têa, hdroâng mơngế ƀă tơdroăng rŭm môi tuăn lâp plâi tơnêi, tơdjuôm ivá troh tah pơreăng a rêm kong têa ƀă lâp plâi tơnêi.

Tiô tối hdrối, Việt Nam kal rôe 150 rơtuh klŏng pơkeăng vaccine hbrâ mơdât COVID 19 vâ pâk ăm dâng 75 rơtuh ngế kuăn pơlê, ƀă tâi tâng kơxô̆ liăn dâng 25 rơpâu 200 rơtal liăn.

A Sa Ly tơplôu ƀă tơbleăng