VOV4.Sêdang - Tiô rơkong krếo thế dêi pôa Tsuyoshi Hasebe, Kăn xiâm hnê ngăn, Kăn pơkuâ Grup Nikkei, pôa Phạm Minh Chính, Ngế pro xiâm hnê ngăn Chin phuh kô veăng Hneăng hôp lâp plâi tơnêi ‘na “Tơdroăng la ngiâ châu Á’’ roh má 26 xua Nikkei tơkŭm po tiô troăng mơ’no tơdrêng tung um tơvi sap ing hâi lơ 20 – 21/5/2021. Châ tơkŭm po rêm hơnăm sap hơnăm 1995 (bu hơnăm 2020 ôh tá tơkŭm po xua pơreăng COVID 19).

Ngế pro xiâm hnê ngăn tơnêi veăng Hneăng hôp lâp plâi tơnêi ‘na tơdroăng la ngiâ châu Á

Hneăng hôp cho môi hneăng hôp lâp plâi tơnêi loi tơngah khât, tơkŭm hên khu râ kăn pơkuâ kal kí, cheăng kâ ƀă mâu ngế rơkê ing lâp kơpong châu Á – Thái Bình Dương tơbleăng rơkong tơpui ‘na mâu tơdroăng kơpong ƀă ai hnoăng dêi châu Á tung lâp plâi tơnêi. Ƀă dó inâi “Tơniăn rơxông klêi kơ’nâi tâi pơreăng COVID 19: Hnoăng dêi châu Á tung tơdroăng mơnhông lâp tơnêi têa”.Hneăng hôp roh kố ai tơdroăng ki veăng dêi hên khu râ kăn pơkuâ châu Á.

A hneăng hôp, mâu khu râ kăn pơkuâ ƀă mâu ngế rơkê veăng tiô tối hdrối kô tơpui tơno ‘na tơdroăng châu Á kô mot tung rơxông nếo môi tiah lâi tung hneăng hên tơdroăng ki ôh tá tơniăn môi tiah dế nôkố.

A Sa Ly tơplôu ƀă tơbleăng