VOV4.Sedang - Tiô rơkong krếo thế dêi Ngế xiâm ngăn ‘na lêng Việt Nam, khu râ kăn xiâm pơkuâ lêng kong têa Sinuâ xua thươ̆ng tươ̆ng Ngụy Phượng Hòa, Kăn xiâm pơkuâ tơdroăng cheăng tơnêi têa, Ngế xiâm pơkuâ lêng, pơkuâ xiâm khu râ kăn lăm pôu pêi cheăng a Việt Nam sap ing hâi lơ 24 troh lơ 27/4. Leh tơdah châ tơkŭm po a kơxê lơ 25/4, a Hà Nội, xua thươ̆ng tươ̆ng Phan Văn Giang, Kăn cheăng tung Khu xiâm kal kí, Kăn phŏ pơkuâ ngăn cheăng Đảng kơvâ lêng tơnêi têa, Ngế xiâm pơkuâ lêng Việt Nam pơkuâ. Klêi kơ’nâi leh tơdah, khu râ kăn teăng mâ khu lêng xiâm péa tơnêi têa tơkŭm po tơpui tơno.

Leh tơdah ngế xiâm pơkuâ lêng kong têa Sinuâ

Thươ̆ng tươ̆ng Phan Văn Giang mơnhên tôí, Đảng, Tơnêi têa, Chin phuh ƀă Khu lêng Việt Nam đi đo nhuô̆m tơdroăng thăm tơrŭm tiô khôi vâi krâ nah ƀă thăm tơrŭm cheăng ton xŏn tŭm têk ƀă Sinuâ. Thươ̆ng tươ̆ng Ngụy Phượng Hòa mơnhên tối, tơrŭm cheăng lêng pơla Sinuâ ƀă Việt Nam cho môi tung mâu tơdroăng cheăng ki kal, kum mơdêk tơrŭm cheăng pơla péa Đảng, péa Tơnêi têa, xua pơxúa dêi kuăn pơlê péa tơnêi têa, xua vâ pro hơniâp lĕm, rak tơniăn, tơrŭm cheăng, mơnhông mơdêk a rêm tơnêi têa xuân môi tiah dêi kơpong ƀă lâp plâi tơnêi.

A Sa Ly tơplôu ƀă tơbleăng