VOV4.Sêdang - Tung roh lăm pôu ƀă pêi cheăng a kong pơlê Dak Nông, kơxo lơ 8/4, pôa Lê Văn Thanh, Ngế xiâm phŏ pơkuâ cheăng pêi – Mô đô̆i rong – Pơlê pơla hiăng lăm séa ngăn tơdroăng pêi cheăng, cheăng pêi a Kŏng ti nhôm Dak Nông – TKV, a cheăm Nhân Cơ, tơring Dak R’lâp. Kŏng ti Nhôm Dak Nông – TKV pêi cheăng sap ing hơnăm 2017, nôkố ai 1.045 ngế pêi cheăng. Mâu hơnăm hiăng hluâ, kŏng ti hiăng pêi pro tro tiô pơkâ ‘na  tơdroăng kĭ tơkêa pêi cheăng, nâp mâu ƀaoh hiêm ăm mơngế pêi cheăng tiô pơkâ. 

Pôa Lê Văn Thanh, Ngế xiâm phŏ pơkuâ cheăng pêi – Mô đô̆i rong – Pơlê pơla diâp kơxuô tơmeăm ăm kŏng nhân hngêi kơmăi Alumin Nhân Cơ.

Tơdroăng rêh ối dêi kăn ƀô̆, kŏng nhân đi đo châ tơtêk, ing mơdêk liăn khế, troăng hơlâ tŏng kum ‘na hngêi ối a tíu tơkŭm ƀă mâu tơmeăm khoăng kum rêh ối pơlê pơla, mơhno túa lĕm tro, tơ’noăng ivá. Kŏng ti ối veăng tơlo liăn ăm kong pơlê, mâu tơdroăng tŏng kum mơngế pá puât, tơdroăng rêh ối pơlê pơla ƀă kơxô̆ liăn lối 69 rơtal liăn.

Pôa Lê Văn Thanh kheăn kơdeăn tơdroăng tơmâng tŏng kum dêi Khu râ kăn pơkuâ Kŏng ti nhôm Dak Nông – TKV ƀă tơdroăng rêh ối mơngế pêi cheăng ƀă mâu tơdroăng tŏng kum pơlê pơla, tŏng kum mâu rơpŏng ai hnoăng tơnêi têa, vâi krâ mâu hdroâng kuăn ngo ai  tơdroăng rêh ối pá puât.

A sa Ly tơplôu ƀă tơbleăng