VOV4.Sêdang - A Hà Nội, Thươ̆ng tươ̆ng Phan Văn Giang, Ngế xiâm pơkuâ lêng hiăng pêi cheăng ƀă kơ koan, tíu pêi cheăng rak tơniăn ăm hneăng tâ phĭu rah xo kăn teăng mâ Kuô̆k hô̆i hneăng má 15 ƀă kăn teăng mâ Hô̆i đong hnê ngăn kuăn pơlê rêm râ hneăng hơnăm 2021 – 2026. A roh pêi cheăng, Thươ̆ng tươ̆ng Phan Văn Giang pơkâ thế mâu kơ koan, tíu pêi cheăng pơtối thăm pêi pro mâu troăng pêi cheăng ‘nâi tơdroăng, đi đo tơpui tơno tơdroăng pơla mâu khu cheăng, mơnhên, ‘nâi nhên hdrối tro khât mâu tơdroăng ki tăng troăng pro ‘mêi, ‘nhê tơnêi têa dêi mâu ngế ki kơneăm tơnêi têa, tơtrâ tơnêi têa.

Mâu tíu cheăng mơdât, pơkuâ krá tơniăn kơpong tơnêi tíu, têa kơxĭ, rơlố, tíu tơkăng kong, tung tơnêi têa ƀă troăng măng internet; hbrâ khu cheăng, rơxế, hbrâ veăng mơdât tơleăng châ tơƀrê mâu tơdroăng ki nếo ai ôh tá lĕm tro. Khu lêng pơtối pêi kơtăng tơdroăng gak kring tung pêi cheăng; tơrŭm ƀă mâu kơ koan, tíu cheăng tung ƀă pa kong khu lêng vâ ‘nâi nhên tơdroăng, gak kring tơniăn roh tâ phĭu.

Rơtế ƀă tơdroăng pêi pro kơtăng mâu troăng hbrâ mơdât pơreăng COVID 19, Thươ̆ng tươ̆ng Phan Văn Giang pơkâ thế mâu kơ koan, tíu cheăng kal pơtối pêi tơtro tơdroăng pơtâng tối, kum kăn ƀô̆, mâu mô đô̆i tung đông lêng pêi pro tơtro hnoăng dêi kuăn pơlê veăng tâ phĭu.

A Sa Ly tơplôu ƀă tơbleăng