VOV4.Sêdang - Pơtối rôh pêi cheăng a mâu kong pơlê kơpong Tơbăng kroăng Cửu Long, kơxo lơ 18/3, jâ Nguyễn Thị Kim Ngân, Kăn xiâm hnê ngăn Kuô̆k hô̆i, Kăn xiâm hnê ngăn Hô̆i đong tâ phĭu tơnêi têa pêi cheăng ƀă Khu hnê mơhno cheăng tâ phĭu rah xo kăn dêi kong pơlê An Giang.

Troh 17 chôu hâi lơ 14/3, Vi ƀan ngăn tâ phĭu kong pơlê An Giang hiăng tơdah xo 15 hồ sơ dêi mâu ngế vâ tơbriât pro kăn Kuô̆k hô̆i ƀă 110 hô sơ dêi mâu ngế vâ tơbriât pro kăn Hô̆i đong kuăn pơlê dêi kong pơlê. Vi ƀan hnê ngăn kuăn pơlê râ cheăm dế séa ngăn tơkŭm chêh i nâi kuăn pơlê mâu ngế ki hiăng kơtê 18 hơnăm tơngi klêng tung kong pơlê tiô tơrêm kơpong tâ phĭu vâ chêh ‘mot inâi kuăn pơlê.

Nôkố, tung kong pơlê An Giang hâi hlo ai ngế ki lâi săm phoăng, săm tơkêng dêi kuăn pơlê ki tơdjâk tơdroăng tâ phĭu. Tơdroăng tối tơbleăng tung hlá tơbeăng rơ’jiu, um tơvi ‘na tơdroăng tâ phĭu châ kong pơlê An Giang pêi hên troăng.

Tơpui hnê mơhno a rôh pêi cheăng, jâ Nguyễn Thị Kim Ngân, Kăn xiâm hnê ngăn Kuô̆k hô̆i, tối tiah kố, An Giang hiăng pêi tro tơdroăng cheăng pơcháu mơjiâng mâu khu ngăn tâ phĭu rah xo kăn hnê ngăn Hô̆i đong kuăn pơlê hlối môi tuăn ƀă 7 tơdroăng cheăng dêi An Giang pơkâ pêi tung la ngiâ; tơngah An Giang hbrâ ƀă tơkŭm po klêi tơniăn hneăng tâ phĭu rah xo kăn Kuô̆k hô̆i Kăn hnê ngăn Hô̆i đong kuăn pơlê rêm râ.

Gương tơplôu ƀă tơbleăng