VOV4.Sêdang - A rôh hôp dêi Khu hnê mơhno hbrâ mơdât pơreăng COVID-19 po a kơxê lơ 1/11, kăn teăng mâ Khu xiâm ngăn pơkeăng pơlât Pơlê kong kân Hồ Chí Minh tối, tơdroăng pâk vaccine ăm vâi hdrêng sap ing 12 hơnăm - 17 hơnăm thế pêi pro tiô pơkâ dêi khu xiâm ngăn pơkeăng pơlât. Ôh tá chiâng pâk ăm vâi hdrêng ki pá xôp 12 hơnăm. Pôa Triịnh Duy Trọng, Ngế pơkuâ ƀơrô cheăng kal ki ‘na tuăn ngôa, khu xiâm ngăn hnê hriâm ƀă hnê mơjiâng tuăn ngôa rơkê Pơlê kong kân Hồ Chí Minh ăm ‘nâi, nôkố xuân ối ai 236 to hngêi trung châ xúa vâ hbrâ mơdât pơreăng COVID-19 hâi teăm tơvêh ăm tơná hngêi trung.

Hôp pơla khu chêh hlá tơbeăng ƀă Khu kăn hnê mơhno hbrâ mơdât pơreăng COVID-19 Pơlê kong kân Hồ Chí Minh

Tơdjâk troh tơdroăng tối ai mâu hngêi trung ki ‘nâ tối thế nôu pâ hok tro ăm phêp pak kơdroh liêu pơkeăng ƀă hok troh lâm 6 xua vâi hâi teăm châ 12 hơnăm vâ châ pâk tro tiô pơkâ pâk lâp lu, ƀok thái pơkeăng Nguyễn Hồ Tâm, Kăn phŏ pơkuâ Tíu xiâm séa ngăn mơdât pơreăng Pơlê kong kân Hồ Chí Minh ăm ‘nâi, tơdroăng pâk ăm mâu vâi hdrêng a hơnăm ki mê thế pêi pro tro tiô khu ki mơjiâng pro pơkeăng hnê ƀă pro tro tro tiô khu xiâm ngăn pơkeăng hiăng pơkâ.

Gương tơplôu ƀă tơbleăng