VOV4.Sêdang -  Troh nôkố, kơvâ nâp hnoăng liăn mơhá kong pơlê Dak Lak nếo châ xo 500 to hồ sơ tung tâi tâng lối chât rơpâu rơpŏng kuăn pơlê tê mơdró a kong pơlê châ kâ liăn tŏng kum tiô tơdroăng pơkâ 68 dêi Chin phuh.

Tiô tơdroăng pơkâ 68 dêi Chin phuh ‘na mâu troăng hơlâ tŏng kum mâu ngế pêi cheăng ƀă mâu ngế ki xúa mâu ngế pêi cheăng trâm xơpá xua pơreăng kân COVID-19, liăn tơnêi têa kô kum môi hdroh 3 rơtuh liăn ƀă mâu rơpŏng ki tê mơdró athế pơtê tê mơdró tung pơla 15 hâi tơngi klêng riân sap ing khế 5/2021 tiô pơkâ dêi kơ koan tơnêi têa vâ hbrâ mơdât pơreăng. Tiô pơkâ, vâ châ tŏng kum, rơpŏng ki tê mơdró athế ai hlá mơéa phêp chêh inâi tê mơdró, ai chêh nâp hnoăng liăn mơhá, ai đơn pâ tŏng kum ƀă châ hô̆i đong séa ngăn a râ cheăm mơnhên, klêi mê pơtroh hồ sơ troh a kơ koan nâp hnoăng liăn mơhá mơnhên.

Rơtế ƀă pơreăng tâ tú rơ-iêo, mê hlá mơéa chêh pro gá xơpá cho môi tung mâu tơdroăng ki pro Dak Lak hrá tung tơdroăng ki pêi pro troăng hơlâ kố.

Katarina Nga tơplôu ƀă tơbleăng