VOV4.Sêdang - Hâi lơ 28/4, rôh apoăng Pakistan (kong têa ki achê Ấn Độ) ai lối 200 ngế hlâ xua COBVID-19, hên má môi tung hâi sap ing apoăng rơnó ki ai pơreăng ƀă chin phuh Pakistan tơbleăng kô séa ngăn xúa mâu tơdroăng pơkâ mơdât kơtăng tâ. Tâi tâng kơxô̆ ngế hlâ a Pakistan hiăng tâk 17.530 ƀă kơxô̆ ngế tâ vâ chê 811 rơpâu ngế. Khu lêng Pakistan hiăng châ tơbleăng troh a 16 to pơlê kong kân ki ai kơxô̆ ngế tâ hên vâ veăng tŏng kum mâu kơ koan ki ai tơdjâk troh tơbleăng mâu troăng hơlâ hbrâ mơdât pơreăng, môi tiah tơdroăng ki pơkâ thế kuăn pơlê truâ kên pâng rơkong môh a tíu ối tơdjuôm ƀă klĭng péa tíu tê mơdró kế tơmeăm ki ôh tá kal klêi kơ’nâi 6 chôu kong măng.

Pôa Faisal Sultan, Ngế xiâm ngăn ‘na pơkeăng ƀă khăm pơlât kong têa Pakistan tối tơbleăng, mâu tơdroăng ki tá hâi pêi pro kơtăng kô châ xúa po rơdâ tâng kuăn pơlê ôh tá pêi pro tiô tơdroăng pơkâ thế klâ ối krê pơlê pơla, truâ kên pâng môh rơkong ƀă mâu tơdroăng ki hbrâ mơdât pơreăng, malối cho tung khế ât hmê Ramadan.

A sa Ly tơplôu ƀă tơbleăng