VOV4.Sêdang - Lối 10 hơnăm kố, Vi ƀan Măt trâ̆n  tơnêi têa cheăm Quảng Hiệp, tơring Cư̆ Mgar kong pơlê Dak Lak hiăng pêi tơdroăng kơdĭng liăn ‘’Păn chu tơnêi’’. Tơdroăng pêi pro kŭn tê la ai pơxúa tơ’mot hên kuăn pơlê veăng, kơdĭng châ rơtal liăn kum kuăn pơlê kơtiê, hdroâng kuăn ngo pro hngêi ối, mơnhông păn mơnăn mơ eăm hluăn ing kơtiê.

Hâi ki tơdah xo toăng hngêi Tơrŭm xua Vi ƀan Măt trâ̆n Tơnêi têa cheăm Quảng Hiệp tŏng kum, nâ Nguyễn Thị Ngoan a thôn Hiệp Thịnh, cheăm Quảng Hiệp, tơring Čư̆ Mgar, kong pơlê Dak Lak ƀriê tung hiâm mơno drêng tơdroăng tơmiât rơhêng vâ ai toăng hngêi pro ki krá kâk hiăng chiâng ai khât:

“Á tro khăng tơbrê̆n chêng kŏng sap ing tơxĭn mê tơdroăng cheăng kâ trâm hên xơpá. Kơnôm ing khu kăn pơkuâ cheăm akố hiăng tŏng kum á môi iâ liăn ăm á mung tơ’nôm vâ pro môi toăng hngêi. Nôkố á mơ-eăm pêi cheăng vâ mơdrếo chĕn, ai liăn păn kuăn ‘nĕng hriâm. Rơpŏng á phiu ro khât, mơnê Tơnêi têa, mơnê mâu khu ki ai hiâm mơno tŏng kum, măt trâ̆n hiăng kum tŏng rơpŏng á”.

Tơdroăng tŏng kum dêi Vi ƀan Măt trâ̆n cheăm Quảng Hiệp hiăng kum rơpŏng pôa Lô Hoàng Thuận mơ-eăm hluăn ing kơtiê

Rơpŏng nâ Ngoan cho môi tung kơxô̆ ki lối chât rơpŏng a cheăm Quảng Hiệp châ tŏng kum mơjiâng pro ăm hngêi ối sap ing “chu tơnêi” kơdĭng liăn xua Măt trâ̆n Tơnêi têa cheăm tơbleăng. Ôh ti xê tŏng kum ‘na hngêi ối, mâu “chu tơnêi” a cheăm Quảng Hiệp ối kum ăm hdrê pêt, măn păn, pro ivá ăm mâu rơpŏng kơtiê mơnhông cheăng kâ. Pôa Lô Hoàng Thuận, a thôn Hiệp Tiến tối, hơnăm 2018 pôa tro khăng kơbrĕn tơdế châ, rơpŏng trâm tơdroăng xơpá. Măt trâ̆n Tơnêi têa cheăm hiăng roê diâp ăm rơpŏng pôa péa to pu pái kơdrâi. Troh nôkố pu pái hiăng ai lối chât to kuăn. Tơdroăng rêh ối rơpŏng pôa rế hía rế chía tơniăn.

“Rơpŏng á châ Vi ƀan Măt trâ̆n Tơnêi têa cheăm Quảng Hiệp tơmâng ngăn, tŏng kum ăm rơpŏng á péa to pu pái vâ păn xuân hiăng châ 2 hơnăm kố, mê nôkố hiăng ai kuăn châ 13 to, vâ rơpŏng á mơ-eăm pêi cheăng kâ, mơ-eăm hluăn ing kơtiê.

Cheăm Quảng Hiệp, nôkố ai lối 15 rơpâu pơ’leăng mâ mơngế, ƀă 13 hdroâng kuăn ngo rơtế rêh ối tơdjuôm, tơdroăng rêh ối dêi vâi krâ nhŏng o ối trâm hên xơpá, malối cho a mâu thôn ki ai hên kơdrâm hdroâng kuăn ngo. Sap ing hơnăm 2011, Vi ƀan Măt trâ̆n Tơnêi têa cheăm Quảng Hiệp hiăng tơbleăng tơdroăng păn chu tơnêi, kơdĭng liăn vâ kum mâu ngế kơtiê ai ivá mơ-eăm.

Pôa Hòa Mạnh Quân, kăn hnê ngăn Vi ƀan Măt trâ̆n Tơnêi têa cheăm Quảng Hiệp, ăm ‘nâi, troh nôkố, tâi tâng kơxô̆ liăn tâ tung chu tơnêi mê châ lối 2 rơtal, kum lối chât rơpŏng hluăn ing kơtiê.

“Tung mâu hơnăm hdrối nah, túa pêi pro kố châ tơdjâk lâp lu, sap ing mâu pôa krâ, jâ krâ ki hiăng hên hơnăm malối cho mâu hơnăm achê kố hlo ai hên mâu ngế ki djâ troăng ahdrối hiăng mơjiâng pro 27 to toăng hngêi ăm rơpŏng kơtiê, kum ‘mâi rơnêu hngêi ăm 12 rơpŏng, teăm tŏng kum ăm lối 60 rơpŏng, mâu ngế krê ki tro kong mê khía mơhot, têa kân lân lu, châi tamo sap ing kơxô̆ liăn ki tâ tung chu kố: Sap ing hơnăm 2017, ngin tơbleăng chiâng túa pơkâ tŏng kum hdrê mơnăn păn ăm rơpŏng kơtiê, troh nôkố tâi tâng pu pái mê hiăng châ lối 700 to”.

“Păn chu tơnêi”, môi tơdroăng pêi mehé kŭn la ai pơxúa hiăng chiâng tơdroăng tơ’noăng ki kân, tơ’mot hên mâu rơxông kuăn pơlê cheăm Quảng Hiệp, tơring Čư̆ Mgar, kong pơlê Dak Lak veăng kơhnâ. Kố xuân cho túa pêi ki tơtro vâ veăng kum mơjiâng tơdroăng rêh ối nếo a kơpong thôn pơlê.

Tuấn Anh chêh

Katarina Nga tơplôu ƀă tơbleăng