VOV4.Sêdang - Kŏng ti On tơhrik Dak Nông nếo tơkŭm po rôh hôp pa kong hnê tối ‘na tơdroăng ki kơdĭng on tơhrik ƀă rak tơniăn tung hngêi trung hriâm, pơxá “Hok tro ƀă ki hlê plĕng kơdĭng on tơhrik, tơniăn, tê mơdró on tơhrik” a Hngêi trung râ môi Nguyễn Bá Ngọc (pơlê kong kơdrâm Gia Nghĩa).

Hok tro veăng tí tăng ‘nâi ‘na xúa on tơhrik tơniăn, kơdĭng

A rôh hôp kố, hok tro châ hnê tối, tiâ mơnhên, tơbleăng ki hlê plĕng ‘na xúa on tơhrik, tơbleăng tơdroăng ki hnê tối kơdĭng xúa on tơhrik. Mâu vâi o xuân veăng kơ-êng tiâ mơnhên: túa ki xúa mâu kế tơmeăm on tơhrik tung rơpŏng hngêi tiah lâi ăm tơniăn, chôu ki xúa hên on tơhrik tung hâi.

PC Dak Nông diâp 30 rơtuh liăn ăm Hngêi trung râ má môi Nguyễn Bá Ngọc

Drêng kố, Kŏng ti On tơhrik Dak Nông hiăng diâp 30 rơtuh liăn ăm Hngêi trung râ má môi Nguyễn Bá Ngọc vâ pong têa klôh kum ăm tơdroăng ki hnê ƀă hriâm. Tiô pơkâ, tung khế 4 ƀă khế 5/2021, PC Dak Nông kô tơrŭm ƀă Khu ngăn hnê hriâm ƀă hnê mơjiâng tuăn ngoâ rơkê kong pơlê Dak Nông tơkŭm po tơ’nôm tơdroăng ki hriâm pa kong xúa on tơhrik kơdĭng ƀă tơniăn a mâu hngêi trung hriâm tung kong pơlê.

Katarina Nga tơplôu ƀă tơbleăng