VOV4.Sêdang - Tíu xiâm mơnúa  pâk ngăn, Tíu xiâm pro mơgruá séa ngăn pơreăng hiăng hiăng pê klêi rôh má 1 pâk vaccine ki mơnúa Covivac  a 120 ngế ki pleăng tơná. Tiô Phŏ yăo sư, Tiê̆n sih Vũ Đình Thiểm, Ngế pơkuâ Tíu xiâm mơnúa pâk ngăn pơkeăng apoăng, hâi lơ 15/5 kố nah, 120 ngế ki pleăng tơná pâk hiăng klêi pâk tŭm 2 rôh vaccine Covivac.

Tiô tối hdrối troh lơ 29/5, Khu tí tăng ‘nâi plĕng pơxiâm xo tâi tâng túa mơ-heăm vâ khăm ngăn mơheăm ki lâi kâi tung 14 hâi klêi pâk rôh má 2 dêi 120 ngế. Klêi mê tâi tâng mâu túa mơheăm ki pâk rôh má 1, hdrối pâk rôh má 2 ƀă 14 hâi klêi pâk rôh má 2 kô châ pơtroh ngi Canada vâ séa ngăn nồng độ ki kâi trâng tung mâu túa mơheăm hdrối ƀă klêi kơ’nâi pâk. 

Klêi hiăng ăm ‘nâi  mơheăm ki kâi trâng ƀă tơdroăng tí tăng ngăn vâ ‘nâi ki tơniăn dêi vaccine, khu tí tăng ‘nâi plĕng tơbleăng ăm Khu xiâm ngăn pơkeăng pơlât vâ pâ pơtroh rôh má 2. Tiô tối hdrối, rôh má 2 kô pâk a khế 7. Covivac cho vaccine COVID-19 xua Tíu xiâm mơjiâng pro vaccine ƀă Mâu pơkeăng pơlât dêi (IVAC) tí tăng ‘nâi plĕng, hriăn mơjiâng pro. Vaccine nôkố châ mơnúa pâk apoăng rôh má môi a Hngêi trung Đại học Y Hà Nội. IVAC xuá kơmăi kơmok ki dâi lê̆m pro vaccine ing tung dế dêi kơtâ í, cho kơmăi ki mơjiâng vaccine chal ton nah, hiăng châ Tiú xiâm mơjiâng pro mê xúa vâ hriê̆n pro vaccine mơdât tơngê kơ-o kơ-ôk tiô rơnó.

Gương tơplôu ƀă tơbleăng