Dak Lak nôkố ai hên tơmeăm pêi lo ing chiâk deăng ki xiâm châ tê ngi kong têa ê, tung mê kơphế, sầu riêng, tiu cho mâu tơmeăm ki ai yă kơnâ. Hơnăm 2025, kơxô̆ liăn châ xo ing tê tơmeăm ngi kong têa ê dêi kong pơlê châ dâng 2,8 rơtal dollars Mih; krê kơphế ƀă sầu riêng châ lối 1 rơtal dollars Mih. Dak Lak dế pơkâ thế pêi rế hía lĕm tơmeăm, tơniăn krúa kế kâ, tí tăng xiâm kối ƀă thế tro tiô kơpong pêt mơjiâng vâ rak vế ƀă po rơdâ mâu kơchơ mơdró tê ngi kong têa ê.

Dak Lak mơ-eăm châ lối 90% tíu mơjiâng pro, uâ pơliê, tê mơdró kế tơmeăm pêt châ ăm hlá mơ-éa mơnhên tŭm tơdroăng lơ mâu hlá mơ-éa mơnhên dêi lâp plâi tơnêi 'na tơniăn krúa kế kâ; tâi tâng tíu tê mơdró kŭn, ngré kĭ tơkêa pêi pro tro tiô pơkâ. Ki rơhêng vâ tối, 100% kơpong pêt, tíu uâ pơliê pro kế tơmeăm tê ngi kong têa ê châ hbru ăm mah kơxô̆, rêm hneăng séa ngăn ƀă 100% kế tơmeăm tê ngi kong têa ê pêi pro tiô pơkâ tăng xiâm kối tiô pơkâ dêi kơchơ tê mơdró.