A hneăng hôp tơpui tơno, sap ing tơdroăng dêi Khu pêi cheăng tơrŭm pêi chiâk deăng Đạ M’ri ăm hlo nhên mâu tơdroăng ki xơpá dế pơkâ mơ'no. Khu pêi cheăng tơrŭm nôkố ai 180 ngế, ƀă vâ chê 450 hectar plâi sầu riêng. Ƀăng deăng pêt plâi sầu riêng, la pơla mâu rơpŏng xuân ối phá tơ-ê dêi rơpó 'na túa pơkâ pêt. Ngế ki rak ngăn tiô tơdroăng ki rơkê plĕng, ngế ki xúa túa pơkâ kih thuât; tơdroăng xúa phon rơvât, pơkeăng rak vế hdrê kơchâi plâi pôm xuân tá hâi teăm tơdâng tơ'mô. Pôa Nguyễn Thanh Sơn, Kăn hnê ngăn Hô̆i đong pơkuâ hlối pro Kăn pơkuâ Khu pêi cheăng tơrŭm pêi chiâk deăng Đạ M’ri ăm 'nâi:

“Tơdroăng nôkố dêi kuăn pơlê pêi chiâk deăng pin mê rêm ngế pêi môi túa, ôh tá ai kơbố môi tiah kơbố. Tơdroăng pơkâ akố cho tơkŭm pêi môi tiah lâi. Khu pêi cheăng tơrŭm ngin hiăng ai túa pơkâ, hnê mơhno, hôp tơpui tơno, mơnúa pêi; ki má mơ'nui cho tơkŭm pêi tiô troăng hưh cơ krá tơniăn ton”.

Troh hâi lơ 18/9/2026, kong pơlê Lâm Đồng ai 1.611 mah kơxô̆ kơpong pêt, tung mê 1.094 mah kum tê ngi kong têa ê hiăng châ kong têa ki rôe kĭ; rơtế ƀă 547 mah kơxô̆ tíu tâ tung kơthung. Laga, 173 mah kơxô̆ kơpong pêt, ƀă ƀăng tơnêi lối 3.600 hectar, ƀă 61 mah kơxô̆ tíu tâ tung kơthung hiăng tro pơtê lơ xo tơvêh. Mâu kơxô̆ ki kố ăm hlo, drêng tơdroăng pro mah kơxô̆ rế hía rế châ pro tơ'lêi hlâu, xing xoăng râ ƀă kơxô̆, ki xiâm pơkuâ kal pơhlêh rơdêi a tơdroăng rak vế klêi kơ'nâi pro mah kơxô̆. Mê cho séa ngăn tơmeăm pêi lo ing chiâk deăng, rak tơniăn tơdroăng pêi pro, chêh tối tŭm, tí tăng xiâm kối ƀă mơdêk hnoăng cheăng dêi rêm ngế tung khu. Pôa Lê Quốc Thanh, Kăn pơkuâ Tíu xiâm hnê mơhnhôk pêi chiâk deăng tơnêi têa tối nhên:

“Mah kơxô̆ kơpong pêt tá hâi chiâng tối ki klâi ôh, gá bu nếo cho tơdroăng ki pơkâ. Ƀă kuăn pơlê ki pêt ƀă túa pơkâ ki lâi, xúa mâu pơkeăng xôh kơdê oâ hdrong tiah lâi, mê tâi tâng mâu tíu chêh ‘măn tơdroăng kal  dêi mah kơxô̆ mê nếo tối ki dâi lĕm dêi tơmeăm pêi lo mê”.

Tơdroăng kố ăm hlo, mah kơxô̆ kơpong pêt ôh tá xê to châ ngăn môi tiah "kơtâ vĕ" vâ djâ tơmeăm pêi lo ing chiâk deăng châ tê tung kơchơ mơdró kong têa ê. Pakĭng rêm mah kơxô̆ mê athế cho môi kơpong pêt châ tơkŭm pêi pêt tơniăn, ai troăng hơlâ pêt tơdâng tơ'mô ƀă ai ivá séa ngăn ki dâi lĕm sap ing apoăng troh mơ'nui. Ing tơdroăng a Lâm Đồng, pơkâ mơ’no ôh tá xê to ƀă sầu riêng mê ƀă hên tơmeăm pêi lo ing chiâk deăng ki ê dêi Tây Nguyên ƀă tung lâp tơnêi têa.