Tíu xiâm hnê mơhnhôk pêi chiâk deăng tơnêi têa tối ăm 'nâi, Pơkâ 36 dêi Chin phuh tơbleăng hâi lơ 31/7 hiăng pro tơ'lêi hlâu tơdroăng ki ăm mah kơxô̆ kơpong pêt, mah kơxô̆ tíu tâ tung kơthung. Tơdroăng ki ăm ƀă rak ngăn mah kơxô̆ châ pêi pro tung măng pơlê pơla, tiô tơdroăng ki tơkŭm po, mâu ngế krê tơbleăng xêh, pôu râng dêi hnoăng cheăng, rơtế ƀă séa ngăn ƀă tí tăng xiâm kối. Klêi kơ'nâi vâ chê 2 khế tơbleăng, lâp tơnêi têa hiăng ăm nếo 787 mah kơxô̆ kơpong pêt.

A Gia Lai, jâ Nguyễn Thị Tố Chân, Phŏ pơkuâ ngăn ‘na chiâk deăng ƀă Hyôh kong prâi ăm ‘nâi, lâp tung kong pơlê ai châ 43 mah kơxô̆ kơpong pêt, mơdêk kơxô̆ kơpong pêt tung lâp kong pơlê ai 424 mah.

“Tơdroăng ki tơkŭm po tí tăng 'nâi plĕng tơdroăng ăm pin hlo mâ ngăn tâi tâng tơdroăng ki rơhêng vâ dêi kuăn pơlê cho ai ‘nâng. Maluâ tiah mê, ki hlê plĕng dêi kuăn pơlê tá hâi tơdâng tơ'mô, xua mê athế pơtối hnê tối, mơhnhôk, hnê mơhno ăm vâi hlê plĕng tơdroăng ki xo môi mah kơxô̆ kơpong pêt cho xo môi tíu vâ mơnhên ki kơnía dêi tơmeăm tơná. Drêng hlê plĕng dêi kuăn pơlê hiăng châ mơdêk mê kô pêi pro klêi tơdroăng ki mơnhên xiâm rêi. Ing mê, mâu khu tơrŭm cheăng, khu mơdró kâ mơjiâng tơdroăng tơrŭm cheăng chêh ‘mot  tung kơmăi tung ing kuăn pơlê”.

Mơhé tơdroăng pro hlá mơ-éa ăm mah kơxô̆ kơpong pêt hiăng tơ'lêi hlâu tâ, kăn teăng mâ khu mơdró ƀă khu pêi cheăng tơrŭm tối tiah kố, rak vế mah kơxô̆ ing rêm rơnó mê nếo cho tơdroăng ki kal thế tơtrŏng. Vâ chiâng pêi pro tơdroăng ki mê, mơngế ki pêi chiâk deăng thế chêh tơdroăng pêt mơjiâng, séa ngăn tơmeăm ki vâ pêt mơjiâng, chêh 'mot tung hồ sơ; tíu ki tâ tung kơthung thế pơtối rak vế mâu tơdroăng ki hiăng chêh tối.

Kố cho mâu tơdroăng ki kal vâ tí tăng 'nâi plĕng ƀă séa ngăn ki dâi lĕm dêi kế tơmeăm pêi lo ing chiâk deăng. Mâu tíu cheăng xuân pâ thế mơjiâng troăng hơlâ vâ khu hnê mơhnhôk pêi chiâk deăng pơlê pơla veăng kum ăm tơdroăng hnê kih thuât, tŏng kum kuăn pơlê pêi chiâk deăng pêi pro ƀă rak vế mâu tơdroăng pơkâ thế dêi mah kơxô̆.

Pôa Lê Quốc Thanh, Ngế pơkuâ Tíu xiâm hnê mơhnhôk pêi chiâk deăng tơnêi têa ăm 'nâi, tung la ngiâ ah khu hnê mơhnhôk pêi chiâk deăng pơlê pơla kô thăm hnê mơhno kuăn pơlê tơkŭm pêi chiâk deăng, hnê mơjiâng mâu ngế pêi cheăng, tơdjêp khu mơdró ƀă khu pêi cheăng tơrŭm ƀă kuăn pơlê ki pêi chiâk deăng; tơdrêng amê hlối tơkŭm mâu tơdroăng tơvâ tơvân vâ pâ thế tah lôi.

“Khu hnê mơhnhôk pêi chiâk deăng pơlê pơla athế rơtế ƀă kuăn pơlê, tơdrêng ƀă kuăn pơlê. Mơni kô athế hơ'lêh túa pêi, kô chiâng pêi hlối a kơdrum plâi sầu riêng, chiâk kơphế, kơdrum krui kơxái, drêng kuăn pơlê dế pêi cheăng, drêng khu ki mê troh tŏng kum kuăn pơlê pêi tơdrêng tiah mâu tơdroăng chêh tối tung điê̆n tưh ƀă mâu tơdroăng ki kuăn pơlê dế trâm".