Túa pêi kố châ tơbleăng pêi a cheăm Krông Buk tung ƀăng tơnêi dâng 150 ha sầu riêng. Tung mê, Kŏng ti pêi cheăng tiô rơnó Nông nghiệp Công nghệ cao Hồng Thuận pro tíu pêt ƀă lo reăng ôh tá tro rơnó a lối 15 ha ƀă hiăng kơ’muăn plâi rôh ki apoăng, tiô tối hdrối kô châ krí tung khế 3. Tiô tơmâng xo a ƀăng tơnêi, plâi sầu riêng hơnăm má 7 ai plâi sap ing 25 – 35 pŭm, ki lĕm châ dâng 90 – 110kg tung môi xiâm, tơ’mô vâ chê 12 tâ̆n/ha.

Nôkố, yă plâi sầu riêng ki plâi ôh tá tro rơnó tê ngi kong ê dâng 160 rơpâu liăn môi kg, kơnâ tâ péa xôh tâng vâ pơchông ƀă rơnó ki ai plâi khât. Mơnhên tối a rôh lăm ngăn, pôa Đỗ Hữu Huy tối tiah kố túa pêt sầu riêng ai plâi ôh tá tro rơnó kô cho troăng prôk ki châ mơhnhôk, veăng gum mơdêk tơƀrê ‘na liăn ngân, hlối xing xoăng rôh krí kơdroh pro pá ‘na pơto chơ prôk a troăng ƀă tơdroăng ki tê plâi.