Troăng kân ƀê tong kŭn kơ’vĕng kơ’vŏng tơkâ hluâ kơphô̆ Đại Lộc, bêng Bình Thuận, kong pơlê Lâm Đồng (hdrối cho cheăm Hàm Hiệp, tơring Hàm Thuận Bắc, kong pơlê Bình Thuận). Péa pâ troăng kân mâu kơdrum reăng mai kân rơdâ reăng tơpo krếo rơnó Hơngui vêh. Klêi kơ’nâi Têt, drêng tơkâng reăng mai hiăng ai reăng hên pa ngiâ hngêi, xuân cho drêng rơpŏng chiân kuăn cháu lăm pêi cheăng kâ hơngế, tơkêa rơnó tơkŭm hơnăm kơ’nâi ah nếo.

Rơpŏng jâ Trần Thị Nhẽ ai 8 ngế kuăn. Ƀă jâ, rêm roh 30 xiâm reăng mai a ngiâ plông hngêi tơpo tâi cho môi xôh hiâm mơno phiu ro:

“Rơnó Hơngui hlo reăng mai cho hâk ro ‘nâng. Reăng mai jâ pêt môi tiah mê cho kuăn cháu dêi jâ pêi cheăng kâ hơngế hâi péa chât to lâi Têt cho vêh kơdrâm tơkŭm, dêi po vêh tâi hâk ro ‘nâng’’.

Reăng mai tơpo, Têt troh. Reăng mai hiăng hŏn, Têt hiăng tâi. Ƀă mơngế pêt reăng mai ối a Hàm Hiệp, bêng Bình Thuận, kong pơlê Lâm Đồng ôh tá xê riân tiô hâi khế, mê ối riân ƀă hơnăm dêi mâu xiâm reăng mai.

Rơpŏng ngoh Hồ Đắc Thuận, pái rơxông ƀă tơdroăng cheăng, nôkố rak ngăn vâ chê 1.000 xiâm reăng mâ kân kŭn tung kơdrum rơdâ vâ chê 1 ha. Ngoh Hồ Đắc Thuận pâ hơnăm rêm xiâm reăng, tung mê ai reăng mai ki hiăng krâ lối 80 hơnăm – tơdroăng ki hdró ing rơxông pâ pôa ngoh nâ:

“Hơnăm ki lâi xuân tiah mê hlo reăng mai cho hlo Têt rêm ngế hâk ro, hâk tơngăm ‘na hơnăm nếo. Rơxông dêi pôa ngoh hiăng ai loăng mai a tơnêi kố. Khôi túa lĕm tro pêt reăng mai dêi pơlê mê á hâk tơngăm ‘na hdrê reăng mai. Hdrê reăng mai dêi á akố mê sap ing 5 troh 18 mơná, ai xú hŏm ki phá tơ-ê. Rêm hơnăm mơngế ing Binh Định, Huế, Đà Nẵng, ing peăng mâ hâi Luô tơkŭm vêh akố rôe reăng mai kơdrâm ‘nâng’’.

Pơlê reăng mai Hàm Hiệp, bêng Bình Thuận, kong pơlê Lâm Đồng ai hrĭng rơpŏng kuăn pơlê chât hơnăm hiăng hluâ rêh ối cheăng ƀă tơdroăng pêt reăng mai. Têt Lo hơnăm nếo Bính Ngọ 2026 hiăng prôk tơkâ hluâ pơlê reăng mai Hàm Hiệp, tơdroăng rêh ối chôa ‘lâng tơniăn tiah hmâ rêm hâi ƀă mâu ngế kuăn pơlê pêi chiâk deăng chôa ‘lâng rak ngăn loăng plâi, trốu tơkâng, pêt rak ngăn. Rêm mơná reăng mai klêh ôh tá xê to mơgêi môi rơnó tơkŭm dêi pó, mê ối po tơdroăng loi tơngah ăm tơdroăng ki vêh a rơnó Hơngui hơnăm la ngiâ.