VOV4.Sêdang - Pơxiâm ing tơdroăng pâ nhoăm Pôa Hồ, a mâu thôn pơlê dêi mơngế Rơteăng a kong pơlê Kon Tum, tơdroăng hriâm tâp ƀă pêi pro tiô troăng tơdjâ hiâm mơhno dêi Pôa Hồ châ kuăn pơlê hriăn tơmiât pơtối rak vế. Pôa A Bơ, krâ pơlê, cho kăn hnê ngăn chi ƀô̆ pơlê Tua Tem, cheăm Đăk Long, tơring Đăk Hà, kong pơlê Kon Tum, cho môi ngế ki kơhnâ hriâm tâp ƀă pêi pro tiô Pôa Hồ hnê tung kơpong hdroâng kuăn ngo a kong pơlê Kon Tum.

Mâu hâi mơ’nui khế 8, tơdroăng pơreăng COVID-19 a mâu kong pơlê peăng Hdroh pro ôh tá tơniăn, a kong pơlê Kon Tum hiăng ai to lâi chât ngế vêh sap ing kơpong ki ai pơreăng yương tĭnh ƀă SARS-CoV-2. Hlo tơdroăng pơreăng mơni kô tâ tú tung pơlê pơla, pôa A Bơ, krâ pơlê, kăn pơkuâ Chi ƀô̆ pơlê Tua Tem, cheăm Đăk Long, tơring Đăk Hà hmâ lăm troh a rêm rơpŏng hnê tối ăm kuăn pơlê pêi pro tơdroăng ki mơgrúa lĕm tơnêi tơníu rêh ối, xúa têa kơdê pơreăng, djâ tơvế kên pâng môh rơkong rêm hâi drêng lo a troăng ƀă pêi pro tơdroăng ki chêh tối dêi inâi châ chăn drêng ai kuăn ‘nĕng lơ nhŏng o vêh sap ing kơpong ki ai pơreăng.

Mâu rơkong pôa A Bơ tơpui, kuăn pơlê tung pơlê Tua Tem pơrá chôu vế ƀă pêi pro xêh. Drêng châ kơ-êng ‘’tơdroăng ki rơkê ‘na hnoăng cheăng hnê tối, mơhnhôk châ tơƀrê khât’’ mê, pôa A Bơ phiu ro, ôh ti ai tơdroăng klâi ôh, á tơmâng ngăn, tô tuăn ăm pơlê pơla cho vâi krâ nhŏng o ‘nâi hiâm mơno á:      

“Á đi đo séa ngăn tung kuăn pơlê lăm chu troh a rêm rơpŏng vâ hnê tối ăm kuăn pơlê malối cho tơdroăng ki tơmiât, túa pêi vâ mơdêk cheăng kâ rêh ối rế hía rế ó kân rơdêi.’Na tơdroăng tơrŭm tung kơpong kuăn pơlê rêh ối, ‘na tơdroăng ki hriâm tâp dêi mâu kuăn ‘nĕng ôh tá chiâng lôi. Mơjiâng túa rêh ối rơkê plĕng tung thôn pơlê pro tiah lâi vâ kuăn pơlê pêi, păn mơnăn mơnoâ, pêt mơjiâng kế tơmeăm, mơnhông cheăng kâ rêh ối ƀă hriâm tâp rế hía rế rơkê”.

Pôa A Bơ, krâ pơlê (‘na hơ-ếo) trâm mâ mơhnhôk mâu ngế hơnăm hiăng hên a pơlê Pa Cheng, cheăm Đăk Long

Hơnăm kố, maluâ hiăng châ 70 hơnăm la pôa A Bơ, krâ pơlê, kăn pơkuâ Chi ƀô̆ xuân rêm hâi ai mâ a pơlê kơpêng, drêng ‘nâ lăm a pơlê kơdâm. Rơtế ƀă hiâm mơno pơkuâ râng dêi hnoăng cheăng, hiâm mơno kơhnâ mê tơdroăng rơkê plĕng dêi môi ngế cho thái, mê nếo pêi dêi hnoăng cheăng rak ngăn hngêi trung hriâm xuân kum pôa hlê plĕng hên tơdroăng. Hlê plĕng tung tơdroăng ki hnê hriâm tơ’nôm ƀă rơkong hnê tối tơleăng, troăng hơlâ pơkâ dêi Đảng, Tơnêi têa, dêi khu kăn pơkuâ rêm râ ing rơkong dêi pôa A Bơ troh ƀă kuăn pơlê rĕng khât, tơ’lêi hlê ƀă achê. Ki nhên gá môi tiah tơdroăng pêi pro mơnhông mơdêk Đảng tung hdroâng kuăn ngo ki tiô khôp, Chi ƀô̆ pơlê Tua Tem ki krâ pơlê pro kăn pơkuâ Đảng ai 11 ngế đảng viên mê 10 ngế đảng viên cho mâu ngế ki tiô khôp.

Tung pêi pro tơdroăng pơkâ kơxô̆ 5 dêi Khu xiâm pơkuâ tơdroăng kal kí ‘’Mơdêk rơdêi hriâm tâp ƀă pêi pro tiô hiâm mơno troăng tơdjâ Hồ Chí Minh’’, Chi ƀô̆ pơlê Tua Tem đi đo djâ troăng ahdrối tung kơxô̆ 9 Chi ƀô̆ ối tung Đảng ƀô̆ cheăm. Kăn pơkuâ Đảng ủy cheăm Đak Long Trần Ngọc Trực, ăm ‘nâi:

“Đảng ƀô̆ mơnhên tối Chi ƀô̆ kố tơdroăng tơbleăng pêi pro Pơkâ kơxô̆ 5 gá rơkê khât. ‘Na hnoăng cheăng tối tơbleăng troh rêm ngế đảng viên. Ai mâu túa pơkâ, hên túa pêi ki tơƀrê. Đảng viên, kuăn pơlê pêi pro kơhnâ khât.Mơgêi 5 hơnăm pêi pro tơdroăng pơkâ kơxô̆ 5, Chi ƀô̆ ƀă pôa A Bơ châ Đảng ƀô̆ cheăm tơbleăng, pơkâ mơ’no ƀă Khu pơkuâ ngăn Đảng tơring séa ngăn diâp Hlá mơéa khê̆n kơdeăn ăm khu pú hên ƀă ngế krê dêi Chi ƀô̆ kố pêi pro rơkê tơdroăng pơkâ kơxô̆ 05”.

Pôa A Bơ, krâ pơlê (ối má péa sap ing hơ-ếo) hnê mơhno kuăn pơlê kih thuât rak ngăn kơphế

Mơdêk hnoăng cheăng dêi tơná, pôa A Bơ, krâ pơlê, kăn pơkuâ Chi ƀô̆ pơlê Tua Tem hiăng ai hên tơdroăng ki veăng kum ăm hnoăng cheăng mơnhông mơdêk tơdjuôm dêi pơlê ƀă dêi cheăm Đăk Long. Kơtăn kố 7 hơnăm, rôh ki cheăm Đăk Long châ mơjiâng kơxô̆ rơpŏng kơklêa, kơtiê châ lối 73%. Mê nôkố, kơxô̆ ki kố chu kơdroh ối 37,2%. Tung mơnhông mơdêk cheăng hơ’lêh tơdroăng rêh ối, pôa A Bơ rế djâ troăng ahdrối, rế hnê tối tơdroăng ki rơkê plĕng, hnê mơhno kuăn pơlê kih thuâ̆t pêt, rak ngăn kơphế, kơxu; hbrâ mơdât pơreăng a mâu kơpôu, ro, păn chu kong ƀă hên ki ê.

Pôa A Sự, kăn hnê ngăn Vi ƀan Măt trâ̆n Tơnêi têa Việt Nam cheăm Đăk Long ăm ‘nâi, pơlê Tua Tem ai 125 rơpŏng kuăn pơlê hdroâng kuăn ngo Rơteăng, pôa A Bơ cho ngế ki djâ troăng ahdrối tung mơnhông hiâm mơno tơrŭm, tơkŭm Kuăn pơlê, cho ngế ki djâ troăng ahdrối dêi rơpŏng hngêi ƀă tung pơlê pơla:

“Pôa A Bơ kơhnâ khât, pôa rêh ối lĕm djâ troăng ahdrối ăm kuăn ‘ne\ng tung hngêi ƀă tá tung thôn pơlê. Hmâ rêm rôh hôp thôn pôa A Bơ tối vâi krâ nhŏng, mê vâi krâ nhŏng tơmâng kơ pôa khât”.

Rơtế ƀă tơdroăng rêh ối dêi kuăn pơlê rêm hâi châ hơ’lêh, mâu hơnăm achê kố a cheăm Đăk Long, tơring Đăk Hà, kong pơlê Kon Tum, kơnôm ing ngế ki djâ troăng ahdrối môi tiah pôa A Bơ, hên tơdroăng ki kơnía git ‘na mơhno túa lĕm tro ki lĕm dêi mơngế Rơteăng châ rak vế, mơdêk. Cheăm Đăk Long ai 5 to pơlê mê tâi tâng mâu pơlê pơrá châ mơjiâng pro kuât tro tiô pơkâ khôi hmâ dêi mơngế Rơteăng, pro tíu xah hêi, hriâm tâp pơlê pơla. Mâu khu tŏn chêng koăng, kơhnhon xuâng châ rak vế ƀă ‘măn chôu ăm mâu rơxông hơnăm ối nếo. Môi kơvâ cheăng ki pêi ƀă kŏng khôi hmâ, môi tiah teăn pong chêa, teăn ếo pơtâk ƀă hên ki ê dế châ po vâ mâu ngế Rơteăng akố mơnhông mơdêk cheăng kâ rơpŏng hngêi.

Khoa Điềm chêh

Katarina Nga tơplôu ƀă tơbleăng